Қазақстанның Әзербайжандағы Елшісі Әлім Байел Әзербайжан Республикасы Мемлекеттік кеден комитетінің төрағасы Шахин Багировпен кездесті.
Кездесу барысында тараптар кедендік, көлік-логистикалық, сауда-экономикалық және басқа да салалардағы екіжақты ынтымақтастықтың қазіргі жағдайы мен болашағын талқылады.
Атап айтқанда, Ә.Байел қазақстандық және әзербайжандық өнімдер, сондай-ақ үшінші елдердің тауарлары транзитінің жалғасып келе жатқан өсуін атап өтіп, осы үрдісті сақтаудың маңыздылығына назар аударды. Дипломат Қазақстан мен Әзербайжан кеден органдарының Транскаспий халықаралық көлік бағыты (ТХКБ) шеңберінде екі ел іске асырып жатқан бірқатар ірі инфрақұрылымдық және логистикалық жобаларды дамытудағы ерекше рөлін атап өтті.
Өз кезегінде Ш.Багиров Әзербайжанның ТХКБ дамытуға жоғары қызығушылығын растады. Ол ағымдағы геоэкономикалық жағдайда Орта дәліздің тек Орталық Азия мен Оңтүстік Кавказ өңірі үшін ғана емес, сонымен қатар жаһандық сауда және көлік жүйелері үшін де өзектілігі артып келе жатқанын атап өтті. Осы тұрғыда Ш.Багиров Қазақстан мен Әзербайжанның кеден құрылымдары арасындағы ынтымақтастықты дамытудың үлкен маңыздылығына назар аударып, рәсімдерді оңайлату, автоматтандыру және цифрландыру қажеттігін айтты.
Тараптар кеден саласындағы екіжақты байланыстардың ағымдағы жағдайын, бірқатар нақты мәселелерді, сондай-ақ осы бағыттағы ынтымақтастықты одан әрі дамыту жөнінде пікір алмасты.
Дереккөз: ҚР СІМ баспасөз қызметі
