Қазақстанда Ұлттық қордан бөлінген қаражаттың жұмсалуына мониторинг жүргізу жөніндегі комиссия жұмысын қайта бастады. Бұл туралы Жоғары аудиторлық палата хабарлады.
Ведомствоның мәліметінше, комиссия 2014 жылы құрылғаннан бастап Ұлттық банктің қарамағында жұмыс істеген. 2020 жылдан бастап комиссияның жұмыс органы Жоғары аудиторлық палата болған.
Қазіргі уақытта мемлекет басшысының тапсырмаларын орындау мақсатында комиссияның қызметі жаңартылған форматта және жаңа құраммен жалғасып отыр.
Ұзақ үзілістен кейін биыл 21 ақпанда Әлихан Смайыловтың төрағалығымен Жоғары аудиторлық палатада комиссияның отырысы өткен. Жиынға Президент әкімшілігінің, Ұлттық банктің, Бас прокуратураның, Сыбайлас жемқорлыққа қарсы іс-қимыл агенттігінің, Қаржы мониторингі агенттігінің, Ұлттық қауіпсіздік комитетінің, Қаржы және Ұлттық экономика министрліктерінің лауазымды тұлғалары, парламент мәжілісі мен сенатының депутаттары және тағы басқа да өкілдер қатысқан.
Отырыс барысында комиссия төрағасы Әлихан Смайылов Ұлттық қор қаражатын жұмсаудың заңдылығы мен тиімділігіне мониторинг жүргізу тәсілдері өзектендірілетінін атап өткен.
«Комиссияның жұмысын қайта бастауымыз керек. Ведомствоаралық іс-қимыл мен Ұлттық қор қаражатының тиімді және мақсатты пайдаланылуын бақылау үшін жауапкершілік аймақтарын нақты айқындау қажет», – деді Әлихан Смайылов.
Оның айтуынша, қазіргі таңда жұртшылық Ұлттық қор қаражатының тиімді пайдаланылуына ерекше назар аударып отыр. Бұл «Ұлттық қор – балаларға» бағдарламасына да қатысты.
«Ұлттық қордан алынатын трансферттерден экономикалық қайтарым болуы қажет. Ұлттық қор мемлекеттік маңызды емес міндеттерге пайдаланылмауы тиіс. Мемлекет басшысы осындай міндет қойды», – деді Жоғары аудиторлық палата төрағасы.
Әлихан Смайылов алдағы кезеңге арналған міндеттерді атап өтті:
- Ұлттық қордан экономиканы жеңілдетілген шарттармен қолдауға бөлінген қаражатқа тексеру жүргізу;
- Ұлттық қор қаражатын неғұрлым басым бағыттарға қайта бөлу немесе оларды қайтару жөнінде ұсыныстар беру.
Сондай-ақ отырыс барысында комиссия құрамын жаңарту, оның қызметін жаңа форматта регламенттеу, қорытындылардың сапасын арттыру және т. б. мәселелер талқыланған.
Айта кетейік, мемлекет басшысы Қасым-Жомарт Тоқаев былтыр қыркүйек айындағы Қазақстан халқына жолдауында Ұлттық қордың ерекше рөлі мен маңыздылығын тағы да атап өткен болатын.
«Қордың қаражатын, ең алдымен, мемлекет мүддесі үшін, яғни еліміздің стратегиялық мақсаттарын жүзеге асыру үшін пайдалану қажет. Ұлттық қор шетелдік қаржы институттарына қызмет етпеуі керек. Ұлттық қор – ұзақ мерзімге арналған макроэкономикалық тұрақтылықты қамтамасыз ететін аса маңызды құрал. Сондықтан оны тиімді басқару қажет», – деген еді президент.
Естеріңізге сала кетейік, жақында мемлекет басшысы Жоғары аудиторлық палатаның төрағасы Әлихан Смайыловты қабылдап, бірқатар тапсырма берген еді.
Дереккөз: kaz.nur.kz
