Қазақстан Республикасының ЮНЕСКО жанындағы Тұрақты өкілдігі ұйымның Париждегі бас пәтерінде аталып өткен Халықаралық ана тілі күніне арналған іс-шараларға қатысты. Бұл мейрам әлемде Бангладештің бастамасымен жыл сайын 21 ақпанда аталып өтеді.
Аталған күнге арналған конференция аясында ғалымдар, сарапшылар, халықаралық және үкіметтік емес ұйымдар, дипломатиялық корпус өкілдерінің қатысуымен арнайы сессиялар өткізілді. Баяндамашылар тілдік әртүрлілікті, жойылып кету қаупі төнген тілдерді сақтап қалу, сондай-ақ елдердің көптілді білім беру саласындағы жетістіктері мен проблемаларын талқыға салды.
ЮНЕСКО жанындағы Қазақстанның Тұрақты өкілі Асқар Абдрахманов өз сөзінде жиналғандарды мемлекеттік қазақ тілін дамыту мақсатында заманауи технологиялар мен жасанды интеллект құралдарын қолдануды қоса алғанда елімізде жүзеге асырылып жатқан кешенді шаралар туралы хабардар етті.
Сонымен қатар Қазақстанда тұратын өзге ұлттағы азаматтардың өз ана тілдерін де үйрену және қолдану құқығын қамтамасыз ету үшін мектептерге, бұқаралық ақпарат құралдарына, театрлар мен этно-мәдени бірлестіктерге жүйелі негізде қолдау көрсетілетінін атап өтті. Осы тұрғыда отандық дипломат биыл 30 жылдық мерейтойын атап өтетін, елдегі ұлтаралық келісімді нығайтуға жағдай жасайтын маңызды институтқа айналған Қазақстан халқы ассамблеясының ерекше рөлін атап өтті.
Сонымен қатар Қазақстан ЮНЕСКО-ның бас пәтерінде Халықаралық ана тілі күнін атап өтуге арналған мәдени бағдарламаға мазмұнды үлес қосты. Қазақстандық музыкант Айгерім Ерсайынова кобызда ЮНЕСКО-ның материалдық емес мәдени мұралар тізіміне енген Қорқыт ата күйлерін орындаған кезде еліміздің сұлу табиғаты мен бай мәдениетін паш ететін бейнебаян көрсетіліп, қазақ тілінде Мұхтар Шахановтың «Төрт ана» өлеңі оқылып, оның француз тіліне аудармасы экранға шығарылды.
ЮНЕСКО-да өткен іс-шаралар ана тілін, сондай-ақ халықтар арасындағы бейбітшілік пен өзара сыйластықты нығайтуда басты рөл ойнайтын мәдени алуандықты сақтау мен дәріптеудің маңыздылығын насихаттау үшін тамаша мүмкіндік болды.
Дереккөз: ҚР СІМ баспасөз қызметі
