Қазақстанның Словениядағы Елшісі Данияр Сарекенов Словения Республикасы Ұлттық жиналысының (Парламент) төрайымы Уршка Клакочар Зупанчичпен кездесті.
Кездесу барысында сұхбаттастар парламентаралық ынтымақтастықтың ағымдағы жай-күйі мен перспективаларын талқылады.
Д.Сарекенов Қазақстандағы саяси және әлеуметтік-экономикалық өзгерістерге тоқталып, екі елдің өкілді органдарының өзара іс-қимылын жандандыру қажеттілігіне тоқталды және ҚР Парламентіндегі Словениямен достық тобының жаңартылған құрамы туралы хабарлады.
Өз кезегінде У.Клакочар Зупанчич Қазақстанды Орталық Азиядағы негізгі серіктес ретінде қарастыратынын айтты және Люблянада ҚР Елшілігінің ашылуын оң бағалады, сондай-ақ Қазақстанмен ынтымақтастық жөніндегі парламенттік достық тобын қайта құру жоспары бар екенін мәлімдеді.
Кездесу соңында Словения Ұлттық жиналысының төрайымы Қазақстан Парламенті Мәжілісінің басшылығына ізгі тілегін жеткізіп, екі елдің заң шығарушы органдары арасында тікелей байланыс орнатуға мүдделі екенін білдірді.
Дереккөз: ҚР СІМ баспасөз қызметі
