Талай чемпиондарды тәрбиелеген азамат

Бүкіл саналы ғұмырын елдің көркеюі, мемлекеттің алға дамуы, спорт саласының кең қанат жаюына арнап, толағай тірліктердің атқарылуына мұрындық болып келе жатқан азаматтар арамызда бар. Солардың бірі – Тасболат Әліқұлов. Тасболат Салбекұлы зейнетке шықтым деп қазір де қарап отырған жоқ, керісінше, кәсіпкерлік салаға бет бұрып, көпшілікке пайдасы мол жұмыстардың қатарын көбейтуде.

Тасболат Әліқұловты жалпақ жұрт жақсы таниды. Спорт саласының ардагері. Бұл азаматты ұлағатты ұстаз деп көпшілік құрметтейді. Өйткені спорт саласында 39 жыл қызмет атқарып, қаншама спортшыларды, талай чемпиондарды тәрбиелеген білікті жаттықтырушы. Бүгінде Қазақстанымыздың түкпір-түкпірінде Тасболат Салбекұлының шәкірттері еселі жұмыс жасауда. Өз жұмысын дене тәрбиесінің мұғалімі болып бастаған Тасболат Әліқұлов, кейіннен спорт мектебіне ауысып, біраз жыл бапкерліктің қыр-сырын меңгерген. Айрықша іскерлігінің арқасында ауданымыздағы Қажымұқан атындағы балалар мен жасөспірімдер спорт мектебінің директоры болып тағайындалып, түрлі аудандық, облыстық, республикалық, тіпті, көптеген халықаралық жарыстарды ұйымдастырған. Сөзді түйіндесек, бүкіл саналы еңбек жолын спорт саласын дамытуға арнаған азамат.

Тасболат Әліқұлов, ардагер спортшы

Тасболат Әліқұлов 2013 жылы абырой биігінде зейнеткерлікке шыққан. Бүгінде жасы жетпісте. Дегенмен, зейнетке шықтым деп қазір де қарап отырған жоқ. 2016 жылы Көктерек кентіндегі 80 орындық «Ақ бұлақ» шипажайын ашып, денсаулық сақтау мен кәсіпкерлік саланы ұштастырып, халыққа келелі қызмет етуде. Сонымен қоса, Тасболат Әліқұлов әліге дейін, қоғамдық жұмыстарға белсене араласып келеді. Көктерек кентіндегі ардагерлер кеңесі бастауыш партия ұйымының төрағасы. Ал, емдеу жағына келсек, «Ақ бұлақ» шипажайында ем алып жатқан демалушылар «осындай жұртқа пайдалы, сауықтыруды жолға қойған азамат Тасболат Әліқұловқа рақмет айтамыз»,-дейді.

Гүлжан Қамысбаева, Қостанай қаласының тұрғыны

Рахымжан Толыбаев, Қазығұрт ауданының тұрғыны

Ардагер спортшы Тасболат Әліқұлов көптеген қайырымдылық шараларды да ұйымдастырып тұрады. Асыраушысынан айырылған, тұрмыс жағдайы төмен, мүмкіндігі шектеулі отбасыларға қолдау көрсетіп келеді. Сонымен қоса, бірқатар зейнеткерлерді жыл сайын «Ақ бұлақ» шипажайына тегін жатқызып, қариялардың денсаулығын нығайтуға да баса көңіл бөледі. «Зейнетке шықтым деп, тоқтап қалмаймын, алда көптеген жоспарларым бар. Спортшылар арасында түрлі халықаралық жарыстар өткізсем деген ниетім бар»,-дейді Тасболат Салбекұлы. Осындай еңбегі мол, елжанды, өнегелі азаматтарға көпшіліктің құрметі әрдайым жоғары болмақ.

Авторлар: Қуаныш Құлмырзаев, Дінислам Тәліпбай