Қазақстанның Гонконг пен Макао, Қытай Халық Республикасының арнайы әкімшілік аудандарындағы Бас консулдығы Наурыз мейрамын кеңінен мерекелеуді ұйымдастырды. Бұл туралы ҚР СІМ баспасөз қызметіне сілтеме жасап satmedia.kz тілшісі хабарлайды.
Іс-шараға Гонконгтың мемлекеттік мекемелерінің өкілдері мен тұрғындары, болу елінің дипломатиялық корпусы, қазақстандық студенттер мен отандастар қатысты.
Мерекенің ресми ашылуында Бас консул Алмас Сейтақынов сөз сөйлеп, қатысушыларға Наурыз мейрамының мағынасы, елімізде оның рөлі мен маңызы туралы түсіндірді. Сондай-ақ 2024 жыл Қазақстанның Қытайдағы туризм жылына орай шетелдік азаматтарды елімізге келуге шақырды.
Сонымен қатар, еліміздің Бас консулдығын Гонконгта ашылғанынан бері 20 жылда алғаш рет, Бас консулдықтың және гонконгтық «CityU» университетінің қолдауымен, осы жоғары оқу орнының салтанатты залында киіз үй орнатылып, еліміздің көрікті жерлерімен сурет галереясы ұйымдастырылды. Гонконгтың тұрғындары мен туристер университетке келіп, Қазақ үйді зерттеп, сурет галереясын наурыз ай бойы тамашалай алады.
Одан бөлек, Бас консулдық CityU-мен бірлесіп қазақстандық «Алатау» театры ансамблінің Гонконгқа келуін ұйымдастырды. Осылайша, ү.ж. 15 наурызда еліміздің әртістерінің концерті өтіп, қазақ ақындарының атақты өлеңдер мен күйлері орындалып, Ұлттық билер көрсетілді. Концертке 600 аса Гонконг тұрғындары мен болу еліндегі 100 қазақстандық азаматтар қатысты. Іс-шара қонақтардың шынайы қуанышы мен қызығушылығын тудырды.
Наурыз мейрамын кеңінен мерекелеу қазақ елінің бай мәдениеті мен дәстүрлерін, тарихын түсіндіруге және Қазақстанның болу елінде имиджін ілгерілетуге, сондай-ақ мемлекеттің туристтік әлеуетін таныстыруға мүмкіндік берді.
Дереккөз: ҚР СІМ баспасөз қызметі
