Кеншілер күнін мерекелеу аясында Өнеркәсіп және құрылыс министрі Ерсайын Нағаспаев Қазақстан Республикасы Президентінің атынан тау-кен және кен өндіру саласының ардагерлері мен мамандарын кәсіби мерекелерімен құттықтап, мемлекеттік наградалар табыстады.

Министр кеншілердің ел дамуына қосқан қомақты үлесін атап өтіп, тау-кен өнеркәсібі индустриялық өсім мен тұрақты экономиканың берік іргетасы екенін айтты. Бүгінде салада 140 мыңнан астам маман еңбек етіп, Қарағанды, Шахтинск, Саран, Абай, Теміртау, Балқаш, Екібастұз, Риддер, Рудный, Лисаковск сияқты қалалар Қазақстанның кеншілер даңқының символына айналды.

Кәсіби мерекеге орай 20 көрнекті сала өкілі мемлекеттік наградалармен марапатталды. Екі маман «Құрмет» орденімен, төртеуі III дәрежелі «Еңбек даңқы» орденімен, 14 кенші «Ерен еңбегі үшін» медалімен марапатталды.

«Бүгінгі таңда тау-кен саласында кәсіпорындарды ауқымды жаңғырту жұмыстары жүргізілуде, заманауи және қауіпсіз еңбек жағдайларын жасауға бағытталған жаңа жобалар жүзеге асырылуда. Әрбір кеншінің өмірі мен денсаулығына ерекше назар аударылуда, өйткені сіздердің қауіпсіздіктеріңіз – бүкіл сала үшін басымдық», –түйіндеді Министр.

Дереккөз: ҚР Өнеркәсіп және құрылыс министрлігі