Қазақстанның Канададағы Елшілігі канадалық «Macdonald-Laurier Institute» («MLI») талдау орталығымен бірлесіп «Орталық Азиядағы Канаданың мүмкіндіктерін зерттеу» тақырыбында дөңгелек үстел өткізді. Бұл туралы ҚР Сыртқы істер министрлігінің баспасөз қызметіне сілтеме жасап satmedia.kz тілшісі хабарлайды.
Іс-шараға Канаданың Сыртқы істер министрлігі мен Парламентінің өкілдері, «Canadian International Council», «Carleton University», «Canadian Global Affairs Institute», «Institute for Peace & Diplomacy» және «Caspian Policy Center» – ойталқы орталықтардың жетекші сарапшылары, сондай-ақ жергілікті академиялық топтар қатысты.
Жиналғандар алдында сөз сөйлеген Қазақстан Елшісі Дәулетбек Құсайынов қатысушыларды елімізде жүргізіліп жатқан саяси және әлеуметтік-экономикалық өзгерістердің негізгі жетістіктерімен таныстырды. Қазақстандық дипломат Қазақстан қоғамын толғандыратын өзекті мәселелер талқыланған Қазақстан Республикасының Президенті Қасым-Жомарт Тоқаевтың қатысуымен өткен Ұлттық құрылтайдың үшінші отырысының қорытындылары туралы хабарлады.
Халықаралық сарапшылар Қазақстанда жүргізіліп жатқан саяси реформаларды, атап айтқанда, Мемлекет басшысының елдегі саяси және әлеуметтік-экономикалық үдерістерді дамытуға бағытталған күш-жігерін жоғары бағалады.
Канадалық тарап Президенттің бағдарламалық мақаласының негізгі месседжтерін, сондай-ақ саяси жүйені түбегейлі өзгертуге, халықты әлеуметтік қорғауға, инвестиция тартуға және Қазақстан экономикасын ынталандыруға бағытталған «Әділетті Қазақстанның экономикалық бағдары» атты Жолдауында айтылған бастамаларды атап өтті.
Қазақстан мен Солтүстік Америка континентіндегі елдер арасындағы инвестициялық, сауда-экономикалық ынтымақтастықты, оның ішінде Транскаспий халықаралық көлік бағытын дамыту перспективаларын талқылау үлкен қызығушылық тудырды.
Жалпы, канадалық тарап тау-кен өнеркәсібі, жаңартылатын энергия, маңызды пайдалы қазбаларды өндіру, мал шаруашылығы, білім беру, қоршаған ортаны қорғау және жасанды интеллектті дамыту сияқты секторларды қоса алғанда, Қазақстан-Канада қарым-қатынастарын дамытуда елеулі әлеуеттің бар екенін атап өтті.
Дөңгелек үстел нәтижесінде осындай іс-шараларды жүйелі түрде өткізу туралы келісімге қол жеткізілді.
Дереккөз: ҚР СІМ баспасөз қызметі
