Израиль кейінгі екі күнде Сирияға шамамен 480 соққы жасап, осы елдің теңіз флотын «бір түнде жойғанын» мәлімдеді. Бұл туралы satmedia.kz тілшісі KAZ.NUR.KZ-ке сілтеме жасап хабарлайды.

CNN телеарнасының мәліметінше, Сирияда Башар Асад жүйесі құлағаннан кейін көршілес жатқан Израиль осы елдің бүкіл аумағындағы әскери нысандарды атқылап, 50 жылда алғаш рет құрлық әскерін буферлік аймақ пен одан басқа да жерлерге орналастырды.

Сейсенбіде Израиль әскерилері екі күннің ішінде шамамен 480 соққымен Сирияның стратегиялық қару арсеналының басым бөлігін жойғанын мәлімдеді. Бұл туралы осы елдің қорғаныс министрі Исраэль Кац Сирия флоты бір түнде жойылғанын айтып, теңіздегі операцияны «зор жетістік» деп бағалады.

Бір күн бұрын Израиль премьер-министрі Биньямин Нетаньяху Сирияда Башар Асад жүйесінің күйреуін Таяу Шығыс тарихындағы жаңа тарауға балады.

«Сириялық жүйенің күйреуі – біздің ХАМАС, Хезболла және Иранды соққылауымыздың тікелей нәтижесі. Әлі толық жойыла қойған жоқ, бірақ біз Таяу Шығыс келбетін өзгертіп жатырмыз», – деп мәлімдеген Нетаньяху.

Израиль шенеуніктері Иранның сенімді одақтасы болған, елінің аумағын Ливандағы Хезболлаға қару-жарақ жеткізуге пайдалануға берген Асад жүйесінің құлауына қуанып жатыр. Дегенмен олар Сирияда билікке келген радикал топтардан секем алып отыр. Сирия мен Израиль арасын Голан жотасы бөліп тұр.

Дереккөз: kaz.nur.kz