АҚШ Мемлекеттік департаментінде Қазақстан Республикасының Елшісі Ержан Ашықбаев пен АҚШ Мемлекеттік хатшысының Азаматтық қауіпсіздік, демократия және адам құқықтары мәселелері жөніндегі орынбасары Узра Зеяның кездесуі өтті.
Кездесу барысында америкалық тарап Қазақстан Президенті Қасым-Жомарт Тоқаевтың саяси реформалары мен демократиялық өзгерістер бағдарламасына берік қолдауын тағы да растады. Атап айтқанда, У. Зея Мемлекет басшысының адам құқықтары мен заң үстемдігі саласындағы Жарлығын және оны жүзеге асыруға арналған іс-қимыл жоспарын құптады.
Тараптар Адам құқықтары мен демократиялық реформалар бойынша жоғары деңгейдегі диалог аясындағы өзара іс-қимылдың негізгі бағыттарын мәнді түрде талқылады. Зорлық-зомбылыққа қарсы, адам саудасына қарсы күрес және инклюзивті қоғамды ілгерілету саласындағы жетістіктер ерекше аталып өтті.
Сонымен қатар, өткен жылғы мемлекет басшылары деңгейіндегі «С5+1» саммитінің қорытындысы бойынша мүмкіндігі шектеулі жандардың құқықтары туралы диалогтың табысты іске қосылғанына назар аударылды.
Кездесу соңында тараптар өзара мүдделер мен ортақ құндылықтарға негізделген жемісті және сенімді ынтымақтастықты одан әрі нығайтуға бейілділігін білдірді.
Дереккөз: ҚР СІМ баспасөз қызметі
