Біріккен Ұлттар Ұйымының штаб-пәтерінде Ауғанстандағы жағдай мен елдегі қиындықтарды шешу жолдарын талқылауға арналған Қауіпсіздік Кеңесінің (ҚК) отырысы өтті. Бұл жиынға ҚК мүшелерімен бірге БҰҰ Бас хатшысының Арнаулы өкілі – БҰҰ-ның Ауғанстанға жәрдемдесу жөніндегі миссиясының (UNAMA) басшысы Роза Отынбаева, сондай-ақ Ауғанстан, Қазақстан, Қырғызстан, Иран, Үндістан, Пәкістан делегациялары және басқа да жоғары лауазымды өкілдер қатысты.
БҰҰ өкілдері ҚК мүшелеріне және отырысқа қатысушыларға Ауғанстандағы ағымдағы жағдай туралы егжей-тегжейлі мәлімет берді. Оның ішінде, елдегі ауыр гуманитарлық жағдай, адам құқықтарының, әсіресе әйелдер мен қыздардың құқықтарының бұзылуы, терроризм қаупі сияқты мәселелерге баса назар аударылды.
Қазақстанның БҰҰ жанындағы Тұрақты өкілі Қайрат Омаров өз сөзінде еліміздің БҰҰ Жарғысына және жалпыға ортақ гуманитарлық қағидаттарға бейілділігін атап өтті. Сонымен қатар, ол Ауғанстандағы әлеуметтік-экономикалық тұрақтылықты қамтамасыз ету үшін БҰҰ агенттіктерінің үйлестірілген жұмысы арқылы көмек көрсетудің маңыздылығына тоқталды. Бұл жұмыстар «Біріңғай БҰҰ» қағидаты негізінде жүзеге асуы қажет екенін айтты.
«Қазақстан Президенті Қасым-Жомарт Тоқаев Орталық Азия мен Ауғанстан үшін Орнықты даму мақсаттары жөніндегі БҰҰ-ның Өңірлік орталығын Алматыда құруды ұсынды. Бұл Орталық аймақ елдерінің экономикасын нығайтуға, жұмыс орындарын ашуға, миграциялық ағындарды тежеуге және елдерді аймақтық сауда желілеріне интеграциялауға бағытталған. Біз экономикалық тұрақтылықтың уақыт өте келе Ауғанстандағы саяси трансформацияның, оның ішінде әйелдер құқығы саласындағы ілгерілеудің негізін қалайтынына сенімдіміз», – деді қазақ дипломаты.
Бұл бастама БҰҰ құрылымдарының ғана емес, сонымен қатар аймақ елдерінің және халықаралық серіктестердің күш-жігерін біріктіруге көмектеседі деп күтілуде. Экономикалық тұрғыдан қуатты Орталық Азия Ауғанстандағы тұрақтылыққа оң әсер ететіні анық.
БҰҰ-ға мүше елдер халықаралық қауымдастық қолдауды қажет ететін миллиондаған ауғандықтардың өмірін жеңілдету үшін барлық қол жетімді құралдарды қолдануы керек деп атап өтті.
Бүкіл өңірдегі тұрақтылыққа нұқсан келтіру қаупінің сақталуын ескере отырып, дипломаттар халықаралық қоғамдастықтың үйлестірілген күш-жігерінің қажеттілігімен келісті.
Дереккөз: ҚР СІМ баспасөз қызметі
