Қазақстанның Грекиядағы Елшісі Тимур Сұлтанғожин порттық және көлік-логистикалық нысандарды жобалау, салу және қайта жаңарту саласында маманданған «TEKAL S.A.» грек компаниясының бас директоры Антониос Панаспен және компания басшылығымен кездесу өткізді.
Компания бірнеше ірі жобаларды жүзеге асыруда, соның ішінде Астир Вулиагмени туристік портын жаңарту (50,8 млн еуро көлемі жоба), Пирей портындағы III-ші батыс пирсты кеңейту, Фтиотида өңіріндегі Арктиса портын дамыту және Лимассол портында 500 метрлік платформаны салу бар.
Келіссөздер барысында Т. Сұлтанғожин Қазақстанның көлік-логистикалық инфрақұрылымын дамыту перспективаларын, соның ішінде Ақтау және Құрық порттарының өткізу қабілеті мен қуатын кеңейту жоспарларымен таныстырды. Сонымен қатар Қазақстанның транзиттік әлеуетін дамыту саласында ықтимал ынтымақтастық бағыттары талқыланды. Транскаспий халықаралық көлік бағытын дамытуға және Қазақстандағы порттық инфрақұрылымды, көлік-логистикалық нысандарды салу мен жаңғыртуға инвестиция тартуға ерекше назар аударылды.
Қазақстан Елшісі Азия-Еуропа көлік дәлізінің ел үшін стратегиялық маңыздылығына назар аударып, логистикалық инфрақұрылымды дамытуға алдыңғы қатарлы халықаралық тәжірибе мен инвестицияларды тартудың маңызын атап өтті.
А. Панас «TEKAL S.A.» компаниясының Қазақстандағы жобаларға қатысуға қызығушылық танытып, Грекия мен Оңтүстік Шығыс Еуропадағы ірі инфрақұрылымдық нысандарды жүзеге асыру тәжірибесімен бөлісті.
Кездесу қорытындысы бойынша тараптар жақын болашақта бірлескен жобаларды жүзеге асыру мүмкіндіктерін бірлесе зерделеуді жалғастыруға келісті.
Дереккөз: ҚР СІМ баспасөз қызметі
