Menu
16 желтоқсан – ҚР тәуелсіздік күні мерекесіне орай, Сарыағаш аудандық мәдениет үйінде мерекелік шара өтті. Онда ауданның дамуы мен өркендеуіне үлес қосқан түрлі сала мамандары мен өңіріміздің құрметті азаматтары марапатталды.
Биыл тәңірдің тәтті сыйы болған тәуелсіздігімізге – 29 жыл. Ата-бабамыз аңсаған, армандап кеткен құны жоғары құндылыққа бүгінгі ұрпақ қол жеткізді. Атаулы мерекені тойлау мақсатында, Сарыағаш аудандық мәдениет үйінде тағылымы жоғары ауқымды шара өтті. Жиынның басында сөз алған аудан әкімі біз үшін қасиетті болған мерекемен жиналғандарды және өңір тұрғындарын құттықтады. Сондай-ақ, ауданның абыройын асқақтатып, оның дамуына сүбелі үлес қосқан азаматтарды марапаттады.
Мұхит Отаршиев, Сарыағаш ауданының әкімі
Шараның жалғасында Мәдениет үйінің өнерпаздары тәуелсіздік күніне арнап оркестрдің орындауында дәстүрлі күйлердің жиынтығын орындады. Жиында Сарыағаш аудандық мәслихатының хатшысы Бақытжан Садықов сөз алды. Ол да аудан тұрғындарын мерекемен құттықтап, «тәуелсіздікті қадірлеп, сақтауымыз қажет»,-дегенді айтты.
Бақытжан Садықов, Сарыағаш аудандық мәслихатының хатшысы
Бүгінгі жиында марапатталғандардың бірі – Сарыағаш ауданынының ардақты ұстазы, Рахымберді Оспанов. «Тәуелсіздігіміздің тұғыры биік болсын!»,-деп сөзін бастаған Сарыағаш қаласының биі, елді мерекемен құттықтады. Сонымен қатар, алғыс хат алған азаматтардың бірі – Сарыағаш аудандық ТЖБ маманы да тұрғындарға ізгі ниетін білдірді.
Рахымберді Оспанов, Сарыағаш қаласының биі
Бекзат Алпысбаев, Сарыағаш аудандық ТЖБ маманы
Құрметті аудан тұрғындары! Өмір өткелдерінен, тағдырдың сан қилы қыры мен дауылдарынан аман өтіп, бізге жеткен қазақтың еңселі егемендік мерекесі құтты болсын. Қасиетті Отанымызға берген жаратушының сыйлығын аман сақтау біздің және болашақ ұрпақтың міндеті.
Авторлар: Мейірхан Бақытжанұлы, Дінислам Тәліпбай
Материалдарды толық және ішінара көшіріп алуға тыйым салынған. Сайт материалдарын пайдаланған жағдайда, ресурсқа сілтеме беріңіз.
