Елдің болашағы туралы сөз болғанда, көбіне үлкен жобалар мен жаңа өндірістерді елестетеміз. Бірақ кез келген үлкен өзгерістің негізінде нақты адам тұр.

Жаңа технологияны меңгерген жас маман, ғылыми жоба жасап жүрген студент, жаңа кәсіп бастаған жас кәсіпкер немесе заманауи мамандық игеріп жүрген колледж студенті — бұлардың әрқайсысы елдің болашақ дамуына өз үлесін қоса алады.

Сондықтан Конституциядағы білім, ғылым, еңбек, прогресс және адам капиталын дамыту бағыттарын мен адамның өз мүмкіндігін арттыруымен байланыстырамын.

Білім алған сайын адамның таңдауы көбейеді. Біліктілік артқан сайын жаңа мүмкіндік пайда болады. Ал жаңа идея мен технология нақты іске айналған кезде оның пайдасы жеке адамнан асып, қоғамға әсер етеді.

Меніңше, елдің ұзақ мерзімді дамуы дәл осындай білімді, еңбекқор және жаңалыққа ашық адамдардың қалыптасуынан басталады.