Қазақстан азаматы АҚШ-тың Флорида штатында көші-қон қызметінің қызметкерлері тарапынан ұсталды.
Қазақстанның Сыртқы істер министрлігі бұл ақпаратты растады. Оқиға туралы алғаш рет Instagram желісіндегі salty_sssalt атты қолданушы жазған. Оның айтуынша, қазақстандық әйел 12 қыркүйекте ұсталған.
Достар, бүгін, 12 қыркүйекте үш баланың анасы, біздің құрбымызды ICE қызметі ұстады! – деп жазды автор.
15 қыркүйекте Қазақстан Сыртқы істер министрлігі жағдайға қатысты түсініктеме берді.
Қазақстан азаматы АҚШ-тың Флорида штатында елдің көші-қон заңнамасында көзделген заңды мәртебесі болмағандықтан ұсталды. Қазақстандық дипломаттар АҚШ-тың мемлекеттік органдарымен және ұсталған азаматтың отбасымен байланыста. Оған қажетті консулдық көмек көрсетіліп жатыр, – делінген СІМ хабарламасында.
Дереккөз: 24kz
