Қазақстанның Израильдегі Елшісі Дәулет Ембердиев Израиль Кнессетінің (Парламентінің) Төрағасы Амир Оханамен кездесті.

Сұхбат барысында тараптар 2025 жылы Қазақстан мен Израиль арасындағы өзара іс-қимыл мәселелерін қарады. Атап айтқанда, парламентаралық ынтымақтастықты тереңдету, өзара сапарларды ұйымдастыру және екі ел парламентшілерінің түрлі алаңдардағы өзара іс-қимылын кеңейту мәселелері талқыланды.

Д. Ембердиев Кнессет Төрағасын Қазақстанның 2024 жылғы дамуының негізгі көрсеткіштері туралы хабардар етті. ҚР Президенті Қасым-Жомарт Тоқаевтың бастамасымен Үкімет алдына қойылған негізгі міндеттерді қоса алғанда, әлеуметтік-экономикалық және саяси реформаларға ерекше назар аударылды.

Өз кезегінде А. Охана Кнессеттің жұмыс механизмі туралы қысқаша баяндап, Израильдің Қазақстанды Орталық Азиядағы негізгі серіктестерінің бірі ретінде қарастыратынын, екі ел арасындағы тығыз байланыстарды, соның ішінде жоғары деңгейдегі ынтымақтастықты ерекше атап өтті. Кнессет Төрағасы Қазақстанда жүргізіліп жатқан реформаларға жоғары баға беріп, екі мемлекет арасындағы парламентаралық қатынастар аясында ынтымақтастықты одан әрі дамыту қажеттілігіне сенім білдірді.

Кездесу қорытындысы бойынша ұзақ мерзімді серіктестікті кеңейту мен тереңдетудің маңыздылығы аталып өтті. Қазақстан мен Израиль арасындағы саяси диалогты нығайтуға, экономикалық байланыстарды дамытуға және негізгі бағыттар бойынша ынтымақтастықты кеңейтуге өзара мүдделілік расталды.

Дереккөз: ҚР СІМ баспасөз қызметі