Қазақстан-Грузия экономикалық бірлестігінің алаңында «Қазақстан мен Грузия арасындағы сауданы жеңілдету, Грузия – Орталық Азия үшін дәліз» атты талдамалық баяндаманың тұсаукесері өтті.
Бұл платформа Грузияда жұмыс істейтін қазақстандық компанияларды және Қазақстанмен сауда-экономикалық, инвестициялық, транзит-көліктік және туристік салаларда қарым-қатынас жасайтын грузин бизнесін біріктіреді.
Іс-шараға бірлестіктің мүшелерімен қатар, Қазақстанмен іскерлік байланыстар орнатқысы келетін ірі грузин кәсіпорындарының басшылары, сондай-ақ журналистер мен сарапшылар қатысты.
«TBC Capital» қаржы институтымен бірлесіп дайындалған баяндаманың тұсаукесерін өткізген Қазақстан-Грузия экономикалық бірлестігінің төрағасы Георгий Джахуташвили Қазақстан Грузия үшін маңызды нарық және серіктес болып қала беретінін, ал 2024 жылы сауда-экономикалық қатынастарда елеулі серпіліс байқалғанын атап өтті. «Грузияның ірі компаниялары өздерінің қазақстандық әріптестерімен ынтымақтастыққа қызығушылық танытуда. Сондықтан бұл құжат терең зерттеу мен талдауды қамтиды – кәсіпкерлерге өздерінің экспорттық-импорттық стратегиясын нақты тұжырымдай алатындай жолдама бола алады», – деді ол.
Өз сөзінде Қазақстанның Грузиядағы Елшісі Мәлік Мырзалин қатысушыларға ҚР экономикалық әлеуеті, үкіметтің іскерлік және инвестициялық, туристік ахуалды жақсарту бойынша қолға алып жатқан шаралары, сондай-ақ Қазақстан-Грузия ынтымақтастығының перспективалары, оның ішінде мемлекеттік ведомстволар мен бизнес-қоғамдастықтардың екіжақты сауданы ұлғайту және қолда бар әлеует пен мүмкіндіктерді іске асыру үшін қолайлы жағдайлар жасау жөніндегі бірлескен жұмысы туралы айтып берді.
Елші грузин бизнесмендерін бірлескен кәсіпорындар ашуға, өңірлік ынтымақтастықты дамыту, мүдделі қазақстандық компаниялармен жаңа жобаларды іске асыру үшін Қазақстанға іскерлік сапарлар жасауға шақырды.
Сонымен қатар Қазақстан мен Грузияны байланыстыратын сауда дәліздерінің тиімді жұмыс істеуі жеке аталып өтті. Бұл тұрғыда Транскаспий халықаралық көлік бағытының өсіп келе жатқан рөлі тұрғысында еліміздің көлік-транзиттік әлеуетіне ерекше назар аударылды.
Сондай-ақ сарапшылар Қазақстан мен Грузия арасындағы туристік сектордағы ынтымақтастықты нығайту мәселелерін, атап айтқанда, осы салада қабылданған шараларды, сын-қатерлер мен проблемалық мәселелерді, даму жолдарын талқылады.
Жалпы, бизнес-қоғамдастық өкілдері инвестициялық, экспорттық және туристік мүмкіндіктерді тиімді пайдалана отырып, екі елдің сауда-экономикалық қатынастарын жандандыруға атсалысуға қызығушылық білдірді. 2025 жылы грузин бизнесмендерінің іскерлік ахуалды зерделеу және ынтымақтастықты кеңейту үшін Қазақстанға сапарын ұйымдастыру туралы уағдаластыққа қол жеткізілді.
Грузияның Ұлттық статистика қызметінің мәліметінше, 2024 жылдың қаңтар-қараша айларында елдеріміз арасындағы тауар айналымы 853 млн АҚШ долларын құрады, бұл 2023 жылдың сәйкес кезеңінен 15%-ға жоғары. Қазақстан – Грузияның 8-ші ірі сауда серіктесі. 2006 жылдан 2023 жылға дейін Грузиядан Қазақстанға тікелей шетелдік инвестициялар ағыны 428 млн долларды құрады. Өз кезегінде осы кезеңде Қазақстан Грузия экономикасына 584,6 млн доллар құйды.
Қазақстан Грузияға келетін туристер саны бойынша негізгі елдердің тізіміне кіреді. 2024 жылдың 9 айының қорытындысы бойынша Грузияға 146 949 қазақстандық турист келді (6 орын), 2023 жылы – 167 492 (6 орын), 2022 жылы – 120 494 (8 орын).
Дереккөз: ҚР СІМ баспасөз қызметі
