Қазақстанның АҚШ-тағы Елшілігі «Arms Control Association» (ACA) үкіметтік емес ұйымымен бірлесіп, «Жаһандық қауіпсіздікті нығайту: ядролық қарудан азат аймақтарды ілгерілету» тақырыбында пікірталас өткізді.

Іс-шараға Қазақстанның АҚШ-тағы Елшісі Ержан Ашықбаев, ACA атқарушы директоры Дэрил Кимбалл, сондай-ақ «Nuclear Threat Initiative», Карнеги Қоры, Джеймс Мартин атындағы қарусыздану Орталығы, Австралия Елшілігі, АҚШ Бейбітшілік Институты және «Foreign Policy for America» үкіметтік емес ұйымдарының өкілдері қатысты.

Талқылау барысында Қазақстанның Елшісі ядролық қарудан азат аймақтардың жаһандық қауіпсіздікті нығайту және ядролық қауіп-қатерлерді азайту бойынша халықаралық күш-жігердің маңызды элементтерінің бірі ретіндегі негізгі рөлін атап өтті. Е. Ашықбаев сондай-ақ биыл Семей келісімінің күшіне енгеніне 15 жыл, ал «ядролық мемлекеттер бестігінің» (P5) Теріс қауіпсіздік кепілдіктері туралы хаттамаға қол қойғанына 10 жыл толғанын еске салды.

«Осыған байланысты, ядролық қаруды таратпау және қарусыздану ісіне берік ел ретінде Қазақстан АҚШ Сенатының Орталық Азия аймағына, Оңтүстік Тынық мұхитындағы Раротонга аймағына және Африкадағы Пелиндаба аймағына қатысты Теріс қауіпсіздік кепілдіктері хаттамаларын тезірек ратификациялауының маңыздылығын ерекше атап өтеді», – деді Елші.

Д. Кимбалл ядролық қарудан азат аймақтардың жаһандық тұрақтылықты нығайту алаңы ретінде қызмет ететінін атап өтіп, АҚШ Сенатын шешімді қадамдарға шақырды.

Пікірталасқа қатысушылар бірлескен көзқарастың маңыздылығын атап өтіп, ынтымақтастықты одан әрі нығайтуға, Теріс қауіпсіздік кепілдіктері хаттамаларын ратификациялауды ілгерілетуге бағытталған күш-жігерді жандандыруға, сондай-ақ жаһандық қауіпсіздік пен ядролық қаруды таратпау мәселелері бойынша диалогты тереңдетуге дайындығын білдірді.

Дереккөз: ҚР СІМ баспасөз қызметі