Нью-Йорктың тарихи бөлігінде Республика күніне орай Қазақстанның мемлекеттік туын көтеру рәсімі өтті, – деп хабарлайды satmedia.kz тілшісі ҚР СІМ-не сілтеме жасап.
Іс-шараға Нью-Йорк қаласының мэриясы, қазақ диаспорасы, іскерлік және студенттер қоғамдастығының өкілдері, сондай-ақ шет елдерінің дипломаттары, Қазақстанның БҰҰ жанындағы Тұрақты өкілдігі мен Бас консулдығы қатысты.
Манхэттеннің басты іскерлік бөлігі – Уолл-Стритте Қазақстанның мемлекеттік туын көтеру рәсімі мейірімді дәстүрге және маңызды іс-шараға айналуда.
Өзінің құттықтау сөзінде Нью-Йорк қаласының мэрі Эрик Адамс қазақстандықтарды Республика күнімен құттықтап, екі ел арасындағы қатынастардың оң динамикасын атап өтті. Барлық қазақстандықтарға амандық тілеп, «Қала мәдениетіне қосқан үлесіңіз үшін рахмет айтамыз», – деді мэр.
Нью-Йорк қаласындағы ҚР Бас консулы Рауан Тілеулин өз сөзінде Республика күнінің тарихи маңыздылығын, сонымен қатар мемлекеттік рәміздердің басты құндылықтарымыз бен идеалдарымызды, ұлттық бірлігіміз және мақтанышымызды білдіретінін атап өтті.
Дереккөз: ҚР СІМ баспасөз қызметі
