Мәжілістің Әлеуметтік-мәдени даму комитетінде жедел жәрдем станцияларын жедел жәрдем көліктерімен жарақтандыру мәселесі бойынша кеңес өтті.
Отырысқа комитет төрағасы Асхат Аймағамбетов жетекшілік етіп, денсаулық сақтау саласы мамандары мен мемлекеттік органдардың өкілдері қатысты.
Жиынды ашқан Асхат Аймағамбетов республика бойынша жедел жәрдем бригадаларымен қамту небәрі 73 пайызды құрайтынын, әлі 379 жедел жәрдем бригадасын ашу керек екенін айтты. Ол қазіргі уақытта тіркелген тариф мөлшері жедел жәрдем станцияларының нақты шығындарын көрсетпейтініне, оны қайта қарау қажеттігіне назар аударды.
Денсаулық сақтау вице-министрі Ержан Нұрлыбаев аталған министрлік Қаржы министрлігіне қалалық және ауылдық мекемелерге арналған тозу нормаларын қайта қарау үшін хат жолдағанын, ол бойынша қалалық жедел жәрдем көліктерінің тозу мерзімін 4 жыл, ал санитарлық автокөлікті 5 жыл деп есептеу ұсынылғанын мәлімдеді.
Депутаттар тарапынан қордаланған проблемаларды шешу үшін жергілікті мәслихаттармен тығыз жұмыс істеу, әрбір өңірде көшпелі отырыстар өткізу, кадр тапшылығы, бригадалар жеткіліксіздігі, тариф мәселелері бойынша денсаулық сақтау министрлігіне өз ұстанымын қалыптастыру керектігі туралы нақты ұсыныстар айтылды.
Дереккөз: parlam.kz
