Мәжілісте Аграрлық мәселелер комитетінің төрағасы Серік Егізбаевтың жетекшілігімен тақырыптық отырыс өтті. Онда еліміздің оңтүстік өңірлерін алдағы суару маусымына дайындау мәселелері талқыланды. Бұл туралы satmedia.kz тілшісі ҚР Парламенті мәжілісінің баспасөз қызметіне сілтеме жасап хабарлайды.
Су ресурстары және ирригация министрлігі Су шаруашылығы комитетінің төрағасы Арсен Жақанбаевтың айтуынша, республикада он жылға белгіленген су пайдалану лимиті бар. 2016-2025 жылдарға арналған лимит 28,6 текше километрді құрайды. Суды ең көп тұтынатын сала – ауыл шаруашылығы, оған барлық судың 65% астамы жұмсалады.
Суармалы судың негізгі бөлігін оңтүстіктегі 5 облыс тұтынады. Олар: Алматы, Жетісу, Жамбыл, Түркістан және Қызылорда облыстары. Алайда Түркістан және Қызылорда облыстарында бірқатар мәселе туындауы мүмкін. Сондықтан облыс әкімдіктеріне күріш дақылын алып тастау ұсынылады.
Сондай-ақ озық су үнемдеу технологияларын кеңінен енгізу қажет. Бұл 2026 жылға қарай 1,5 текше километрге дейін су үнемдеуге мүмкіндік береді.
Өз кезегінде Ауыл шаруашылығы вице-министрі Азат Сұлтанов оңтүстік өңірлерде күріш секілді ылғалды көп қажет ететін дақылдар алқаптарын қысқарту жоспарланып отырғанын айтты. Қысқартылған алқаптардың орнына картоптың, қант қызылшасының, жемшөп дақылдарының ауданы ұлғайтылатын болады.
Алматы, Жамбыл, Жетісу, Қызылорда және Түркістан облыстары әкімдіктерінің өкілдері өңірлерді сумен қамтамасыз ету бойынша қазіргі жағдайды бейнебайланыс арқылы баяндады.
Мәжіліс депутаттары вегетациялық кезеңде ауыл шаруашылығы тауарларын өндірушілерді суармалы сумен қамтамасыз ету бойынша уақытылы шаралар қабылдау керек екенін атап өтіп, өз ұсыныстары мен ескертулерін айтты. Барлық ұсыныс-пікірлер Үкіметке жолданатын болады.
Дереккөз: ҚР Парламенті мәжілісінің баспасөз қызметі
