1-қыркүйек елімізде Білім мерекесі ғана емес, Президент Қасым-Жомарт Тоқаевтың Қазақстан халқына Жолдауын арнайтын дәсүрлі күні. Жыл сайын дәл осы датада Мемлекет басшысы атқарылған жұмыстарды саралап, алдағы жылға бағыт-бағдар ұсынады. Биылғы Жолдау елге «Әділетті Қазақстанның экономикалық бағдары» деген атаумен жол тартты. VIIІ шақырылымдағы Парламенттің екінші сессиясында сөз алған Қасым-Жомарт Кемелұлы, Су ресурстары және ирригация министрлігі құрылатынын мәлімдеді.

1. Қазақстан үшін тіршілік көзінің маңыздылығы бағалы металдардан кем емес екендігін атап өткен Президент, су шаруашылығы жүйесін тиімді дамыту үшін бұл саламен дербес бір мекеме айналысуы қажет деді. Сол себепті де арнайы министрлік құру идеясын ұсынды және еліміздегі су шаруашылығы саласына түгел реформа жасалатынын ескертті.
2. Елімізде қайтадан Көлік министрлігі де құрылуы мүмкін. Өйткені көлік-логистика саласын қарқынды дамыту – стратегиялық міндет деді Мемелекет басшысы. Қасым-Жомарт Кемелұлының сөзіне сүйенсек, бұл министрлік жол инфрақұрылымын салумен де айналысады.
3. Соңғы кездері балаларға қатысты жасалып жатқан түрлі құқықбұзушылықтарға байланысты Тоқаев бірқатар мәлімдемелер жасады. Жас ұрпақтың қауіпсіз әрі алаңсыз өмір сүруін қамтамасыз ету – мемлекеттің міндетін екендігін айтқан ол, «кәмелетке толмағандарға жасалған зорлық-зомбылықтың кез келген түріне қатысты жазаны күшейтуді» талап етті. Зорлық-зомбылыққа және қысымға, бір сөзбен айтқанда буллингке тап болғандарға көмек көрсетуге арналған бағдарлама әзірлеу керек деді Президент.
4. Мемлекет басшысы ұлттық қауіпсіздік мәселесіне де баса назар аударды. «Біздің армиямыз жоғары технологиялы қару-жарақпен және әскери техникамен, соның ішінде бронды техникамен, ұшқышсыз басқарылатын ұшу аппараттарымен, қазіргі заманғы атыс қаруларымен жабдықталуға тиіс» деді ол.
5. Агроөнеркәсіп саласы да назардан тыс қалмады. Ауыл шаруашылығы бағытында серпіліс керектігін айтқан Қасым-Жомарт Тоқаев, «Қазақстанның стратегиялық мақсаты – Еуразия құрлығындағы басты аграрлық орталықтың біріне айналу» екенін ашық айтты. Оның ішінде, ет, сүт, астық өнімдерін терең өңдеу және өндірістік жылыжай шаруашылықтарын дамытуға басымдық беру керектігін алға тартты.
6. Тағы бір жаңалық. Атом электр станциясын салу немесе салмау мәселесі – жалпыұлттық референдумда шешілетін болды.