Menu
Сарыағаш ауданына қарасты Жарты төбе ауылдық округінің №9 Майлықожа жалпы орта мектебінде Майлы ақынның 185 жылдық мерейтойына орай салтанатты кеш ұйымдастырылды. Іс-шара барысында білім ұясының шәкірттері мен ұстаздары Майлықожаның шығармашылығын барынша айшықтап, қалың көпшілікке тұлғаның болмысын жеткізуге тырысты. Рухани кеш барысын Нағима Әбдірахым баяндап берсін.
«Майлықожа ақынның ізімен» деп аталатын шараның негізгі көздегені – Майлықожа Сұлтанқожаұлының 185 жылдық мерейтойын лайықты деңгейде атап өту және сол арқылы жас буынға Қаратау өңірінің сөз шебері қалдырған мол мұраны насихаттау, Майлы ақынның терме-жырларын жаңғырту, әрі көрнекті тұлғаның рухына тағзым ету.
Ергеш Исақов, Жарты төбе а/о ардагерлер кеңесінің төрағасы
Руханиятқа толы шараның өтуіне ұйытқы болған Жарты төбе ауылдық округінің әкімдігі болса, кешті ұйымдастырған – №9 Майлықожа жалпы орта мектебінің ұжымы.
Абай Аширов, Жарты төбе а/о әкімі
Майылқожа Сұлтанқожаұлы – ауыл молдасынан сауат ашып, ескіше хат таныған. 14 жасында әкесiнен айырылған ол, тағдыр тауқыметiн көп көргендіктен, терме-толғаулар шығарып, айтыс өнерiне де араласқан. «XIX ғасырда өмір сүрген ақын-жыраулардың ішінде терең мағыналы нақыл сөздерімен ерекшеленеді. Сондықтан артында бай мұра қалдырып, елдің ықыласына бөленген суырып-салма ақынның мерейтойын атап өту – біз үшін қасиетті парыз», -дейді аталмыш мектеп басшысы.
Жұлдыз Абишева, №9 Майлықожа жалпы орта мектебінің директоры
Бала күнінде тек мұсылманша сауат алған болса да, кейіннен өз бетімен ізденіп, заманына сай білім дәрежесіне жеткен Майлықожаның өнегелі сөздері әлі күнге дейін ауыздан-ауызға көшіп, нақыл сөздерге, терең мағыналы жыр-термелерге айналды. Бүгінгі жиында ақынның шығармашылығы мен қиын-қыстау өмірін зерттеген мектеп оқушылары баяндамалар жасаса, бір топ жас оқырман сөз мергенінің өлеңдерін оқыды. Майлықожа ақынның өмірі мен өнерін зерттеуші ауданымыздың құрметті азаматы Сейітомар Саттаров та жиын кезінде сөз алып, ұйымдастырушыларға алғысын білдірді.
Сейітомар Саттаров, Сарыағаш ауданының құрметті азаматы
Әдебиет зерттеушілері Майлықожаның әдеби мұрасын жанры мен мазмұнына қарай бірнеше тақырыптарға бөледі. Олар: ғибрат, нақылдар, арнау, дастан-мысалдар және айтыстар. Майлы ақын мұндай мәнді шығармаларының біразын жазбаша қалдырса, енді қалғандарын ауызша айтып кеткен. Сондықтан тұғырлы тұлғаның тағылымды тағдыры мен шоқтығы биік шығармалары әлі де мұқият зерттеуді қажет етері сөзсіз.
Авторлар: Нағима Әбдірахым, Айдос Дәулет
Материалдарды толық және ішінара көшіріп алуға тыйым салынған. Сайт материалдарын пайдаланған жағдайда, ресурсқа сілтеме беріңіз.
