Әлемдік және дәстүрлі діндер лидерлерінің VIII съезіне дайындық жұмыстары аясында Қазақстан Елшісі Дәулет Ембердиев Израильдің көрнекті дін қайраткерлері – Бас Сефард раввині Дэвид Йосеф, Бас Ашкеназ раввин Қалман Бер, Иерусалим Патриархы Феофил III мен Бахаи қауымдастығының Бас хатшысы Давид Рутштейнмен кездесті.
Тараптар Съезді ұйымдастыру бойынша дайындық жұмыстарын және дінаралық диалогты нығайту мәселелерін талқылады. Тәжірибе алмасуға және халықтар арасындағы мәдени байланыстарды нығайтуға байланысты мәселелерге ерекше назар аударылды.
Д.Ембердиев Қазақстан астанасында 2003 жылдан бері ұйымдастырылатын Әлемдік және дәстүрлі діндер лидерлерінің съезіне ұдайы қолдау көрсетіп, белсенді қатысып келе жатқан рухани жетекшілерге ризашылығын білдірді. Иерусалимде өткен кездесулер аясында діни лидерлерге ҚР Президенті Қасым-Жомарт Тоқаевтың атынан 2025 жылдың қыркүйегінде Астанада жоспарланған VIIІ Съезге қатысуға ресми шақырулар табысталды.
Дін қайраткерлері Қазақстан Президентіне шақырғаны үшін алғыс білдіріп, аталған іс-шара бүкіл адамзат үшін бейбіт болашақ құру жолындағы негізгі фактор болып табылатын дінаралық және өркениетаралық диалог идеясын одан әрі ілгерілетуге ықпал ететінін атап өтті.
Дереккөз: ҚР СІМ баспасөз қызметі
