Қазақстан мен Қытай арасындағы өңірлік ынтымақтастықты дамыту мақсатында Қазақстан Республикасының Сиань қаласындағы Бас консулы Жошыхан Қыраубаев Хубэй провинциясына жұмыс сапарымен барды. Бұл туралы satmedia.kz тілшісі ҚР СІМ баспасөз қызметіне сілтеме жасап хабарлайды.
Хубэй провинциясының Сыртқы істер басқармасының басшысы Чжан Сяомэймен кездесіп, екі жақты қатынастарды жандандыру тетіктері бойынша пікір алмасылды. Өз құзыреті шеңберінде, тараптар өңіраралық және іскерлік байланыстарды дамытуға күш салуға келісті.
Сонымен қатар, Ухань университетінде білім алушы қазақстандық студенттермен және университеттің халықаралық байланыстарына жауапты проректоры Тан Чиджумен кездесті. Екі жақты студенттер мен мамандар алмасу, білім беру саласының перспективалары талқыланды.
Отандық өндіріске шетелдік инвестиция тарту мақсатында «Dongfeng Motor Corporation» мен «Chitian Automobile Co. LTD» жеңіл және ауыр автокөліктер шығарушы компаниялардың жұмысымен танысты. Қазақстанның географиялық және Кеден одағындағы экономикалық серіктестік мүмкіндіктері негізге алынып, аталған компанияның өндірістік өкілдігін ашу мүмкіндігі қарастырылды.
Кездесуде Хубэйдың ірі машина жасау компанияларын ү.ж. 17-19 сәуір аралығында Астана қаласында EXPO халықаралық көрме орталығында өтетін қосалқы бөлшектердің, автокомпоненттердің, автомобильдерге техникалық қызмет көрсетуге жабдықтары мен тауарлардың халықаралық көрмесіне қатысуға шақырды.
Бас консул Хубэй провинциясының Сауда-экономикалық қатынастар департаментінің басшылығымен Қазақстан мен Хубэй өлкесі арасындағы әртарапты экономикалық байланыстарды дамыту бойынша пікір алмасты. Тараптардың сауда әлеуетін жоғары бағалап, қытай мен қазақстандық жеке және орта бизнес өкілдерінің байланысын нығайтуға шақырды.
Сапар шеңберінде Хубэй өңірінің әуе, темір жол, кеме тасымалындағы логистикалық «Wuhan Hanou International Logistics Co., Ltd» порт пен Еркін сауда аймағы басшылығымен кездесті. Келіссөздер барысында контейнерлік пойыздардың халықаралық интермодальдық тасымалының ауқымы мен сапасын арттыру үшін 2024 жылғы 28 ақпанда Сиань қаласында (ҚХР) ашылған көлік-логистикалық Құрғақ портымен серіктестік орнату мүмкіндігі талқыланды.
Сонымен қатар, қытай тарапы Қазақстанның отандық тамақ өнімдеріне қызығушылық білдіріп, қарамағындағы Кедендік бонд аумағында қазақстандық өнімді өңдеу мен сақтау, сату мүмкіндігін ұсынды. Жұмысты ұйымдастыру мақсатында Қазақстан өндіріс мүмкіндігі мен ішкі нарығын сараптаушы бизнес делегациясын жолдауға келісті.
Дереккөз: ҚР СІМ баспасөз қызметі
