Қазақстан Республикасының Подгорица қаласындағы Бас консулы Ғабиден Темірбек Черногорияның Туризм министрі Симонида Кордичпен екіжақты кездесу өткізді.
Сұхбат барысында тараптар Қазақстан мен Черногория арасындағы туризм саласындағы ынтымақтастықты дамыту перспективаларын, туристік ағынды ұлғайту және іскерлік байланыстарды нығайту мәселелерін талқылады.
Ғ.Темірбек екі ел арасындағы туристік және іскерлік байланыстарды одан әрі дамыту үшін визасыз режимнің маңыздылығына назар аударды. Осы орайда ол Қазақстан азаматтары үшін Черногория тарапынан жыл сайын енгізілетін маусымдық визасыз режимнің 2025 жылы да жалғасатынына үміт білдірді.
С.Кордич Қазақстанмен туризм саласындағы серіктестікті дамыту және екіжақты туристік ағынды арттыру мәселелеріне қызығушылық танытып, әуе қатынастарын дамыту, визалық рәсімдерді оңтайландыру бағыттарын ерекше атап өтті. Сонымен қатар ол маусымдық визасыз режим мәселесінің қазіргі уақытта Черногория Сыртқы істер министрлігі Еуропалық одақтың тиісті органдарымен бірлесіп қарастырып жатқанын хабарлады.
Кездесу қорытындысы бойынша тараптар Қазақстан мен Черногория арасындағы туризм саласындағы өзара іс-қимылды күшейту, туристік әлеуетті тиімді пайдалану және ұзақ мерзімді серіктестікті дамыту мақсатында бірлескен жұмыс жүргізуді жалғастыруға келісті.
Дереккөз: ҚР СІМ баспасөз қызметі
