Қазақстан Республикасының Иордан Хашимит Корольдігіндегі Елшісі Талғат Шалданбай Иорданияның Ауыл шаруашылығы министрі Халед Мұса Әл-Хнейфатпен кездесті.
Сұхбат барысында тараптар ауыл шаруашылығы саласындағы ағымдағы ынтымақтастықты, атап айтқанда қазақстандық қой етінің Иордания нарығына жеткізілімдерін ұлғайту мәселелерін, еліміздің агроөнеркәсіптік кешеніндегі бірлескен инвестициялық жобаларды, сондай-ақ қазақстандық бидайды Иордания нарығына жеткізу перспективаларын талқылады.
Тараптар үстіміздегі жылғы ақпан айында Амман қаласында қол қойылған Ветеринария саласындағы ынтымақтастық туралы меморандумды ризашылықпен атап өтті. Бұл екі елдің уәкілетті органдарының өзара іс-қимылын әрі қарай жандандыруға мүмкіндік береді және ауыл шаруашылығы өнімдерін өзара жеткізуге оң әсер етеді.
Елші Қазақстанның агроөнеркәсіптік кешенінің инвестициялық тартымдылығын атап өтті. Иордания іскерлік қоғамдастығын ауыл шаруашылығы өнімдерінің тауар алмасу процесіне тартудың маңыздылығына назар аударды. Иордан ауыл шаруашылығы өндірушілерінің Қазақстан-Иордания бизнес-форумына қатысуының орындылығы аталып өтіп, оны Қазақстанда 2025 жылдың соңына дейін өткізу жоспарланып отырғандығы хабарланды. Сонымен қатар қазақ дипломаты Х. Хнейфатқа үстіміздегі жылғы мамырда өтетін Астана халықаралық форумына (AIF-2025) шақыруды табыс етті.
Иорданияның Ауыл шаруашылығы министрі шақыруды ризашылықпен қабылдап, иордан ауыл шаруашылығы өндірушілерінің қазақстандық кәсіпорындармен ынтымақтастыққа мүдделілігін білдірді. Сонымен қатар М.Әл-Хнейфат қазақстандық нарыққа Иорданияда өндірілген көкөністер, жемістер, құрма және зәйтүн майын жеткізу әлеуетін атап өтті.
Дереккөз: ҚР СІМ баспасөз қызметі
