Қазақстанның Израильдегі Елшісі Дәулет Ембердиев қала құрылысын басқару және қауіпсіздікті қамтамасыз ету үшін геоақпараттық жүйелерді (GIS) әзірлеуге маманданған израильдік «Orhitec GIS» компаниясының өкілдерімен кездесу өткізді.
Д. Ембердиев бұл саладағы өзара тиімді ынтымақтастық үшін барлық әлеуеттің бар екендігін атап өтіп, Ғылым және технологиялар жөніндегі ұлттық кеңестің өткен жылғы отырысында, сондай-ақ Жасанды интеллектті дамытудың 2024-2029 жылдарға арналған алғашқы қазақстандық тұжырымдамасында ҚР Президенті Қасым-Жомарт Тоқаев белгілеген цифрландыру, озық технологияларды дамыту және елімізде жасанды интеллектті енгізу перспективалары туралы егжей-тегжейлі хабардар етті.
Компания мемлекеттік органдарға көптеген бизнес процестерді автоматтандыруға және муниципалдық ресурстарды тиімді басқаруды қамтамасыз етуге мүмкіндік беретін Еуропа мен АҚШ-ты қоса алғанда, бірқатар елдерде сәтті қолданылатын технологиялық шешімдерін ұсынды.
Кездесу озық технологиялар мен инновациялар саласындағы ынтымақтастықты дамыту үшін елеулі әлеуеттің бар екенін растады. Жақын арада серіктестік шарттарын егжей-тегжейлі талқылау және алғашқы бірлескен жобаларды іске қосу жоспарлануда.
«Orhitec GIS Group Ltd.» – 1999 жылы негізі қаланған израильдік компания ERP/GIS технологияларын қолдана отырып, «smart» қалаларды басқару шешімдерін әзірлеуге және енгізуге маманданған. Компания мемлекеттік және муниципалдық органдарға, сондай-ақ әртүрлі қоғамдық ұйымдарға арналған кешенді шешімдерді ұсынады.
Дереккөз: ҚР СІМ баспасөз қызметі
