Қазақстанның Швейцария Конфедерациясындағы Елшісі Қайрат Саржанов Швейцария Федералдық мәдениет кеңсесінің директоры Карин Бахманмен кездесті.

Кездесу барысында ҚР Елшісі екіжақты ынтымақтастықтың үдемелі дамуын және қазақ тарапының мәдениет пен өнер саласындағы өзара іс-қимылды кеңейтуге мүдделілігін атап өтіп, осы салалардағы жекелеген жобаларға, соның ішінде Швейцарияның қалаларындағы «Астана Балет», «Наз» мемлекеттік би театры, «Тұран» этно-фольклорлық ансамблі концерттеріне назар аударды. Ол қазақ даласының өкілдері сыйға тартқан швейцариялық дипломат және саяхатшы Анри Мозердің коллекциясынан XIX ғасырдың экспонаттары сақталған Берн тарихи мұражайымен серіктестікке ерекше көңіл бөлді. Осы тұрғыда Қ.Саржанов елдің өркендеуінің негізі ретінде ұлттық бірегейліктің қалыптасуы туралы айтып, «Born Bold» халықаралық науқанының негізгі мазмұнымен бөлісті.

Өз тарапынан К.Бахманн федералдық деңгейде мәдени саясатты жүзеге асыру басымдықтары, тілдерді қолдаудың жергілікті тәжірибесі және Швейцарияның басқа да мәдени ерекшеліктері туралы ақпаратты жеткізді. Ол қазақ халқының өзіндік мәдениетіне қызығушылық білдіре отырып, Қазақстанмен өзара іс-қимылды нығайту мүмкіндігін қолдады.

Сұхбаттастар серіктестіктің әлеуетті бағыттарын зерделеуге, сондай-ақ екі елдің ведомстволары арасында байланыс орнатуға жәрдемдесуге келісті.

Дереккөз: ҚР СІМ баспасөз қызметі