«Праса-ду-Империу» тарихи маңызды алаңда және кейіннен Белен сарайында Қазақстан Республикасының Елшісі Жан Ғалиевтің Португалия Республикасының Президенті Марселу Ребелу де Соузаға сенім грамоталарын тапсыру рәсімі өтті.
Аудиенция барысында қазақ дипломаты Қазақстан Президенті Қасым-Жомарт Тоқаевтың Португалия мемлекет басшысы атына арнаған ізгі тілектері мен сәлемін жеткізіп, Астананың екіжақты қарым-қатынастарды одан әрі нығайтуға және кеңейтуге деген ұмтылысын ерекше атап өтті.
Португалия Үкіметі мен Президент Әкімшілігінің өкілдері қатысқан кездесу барысында екі ел арасындағы саяси, сауда-экономикалық және мәдени-гуманитарлық салалардағы ынтымақтастықтың қазіргі жай-күйі мен оны кеңейтудің болашағы талқыланды. Инвестициялық өзара іс-қимылды арттыру, жаңартылатын энергия көздері, цифрлық технологиялар, жасанды интеллект, сирек жер металдарын игеру, көлік, логистика, туризм, медицина және білім беру салаларындағы әріптестікті дамыту мәселелеріне ерекше назар аударылды.
Елші екіжақты ынтымақтастықты тереңдетуге айтарлықтай әлеуеттің бар екенін атап өтіп, сауда айналымының көлемін ұлғайтуға және экономикалық байланыстарды нығайтуға бағытталған бірлескен жобалар мен бастамаларды жүзеге асырудың маңыздылығын ерекше атап көрсетті.
«Президент Қасым-Жомарт Тоқаевтың Әділетті Қазақстанды қалыптастыру бағыты аясында ауқымды саяси және әлеуметтік-экономикалық реформаларды іске асырып жатқан Қазақстан Португалияны Еуропалық одақтағы, БҰҰ және басқа да халықаралық ұйымдардағы сенімді серіктес ретінде қарастырады», – деп мәлімдеді Ж. Ғалиев.
Президент М. де Соуза 2023 жылғы қыркүйекте БҰҰ Бас Ассамблеясы алаңында Президент Қ. Тоқаевпен өткен кездесуін жылы лебізбен еске алып, Қазақстанның түбегейлі өзгерістер жолындағы жетістіктерін жоғары бағалады. Сондай-ақ Астананың бейбітшіл, белсенді және теңгерімді сыртқы саясатының арқасында елдің халықаралық аренадағы беделінің нығайып келе жатқанын атап өтті. Португалия көшбасшысы екіжақты ықпалдастықты өзара мүдделі салаларда прагматизм рухында кеңейтуге және Қазақстандағы португалдық инвестициялар ауқымын арттыруға дайын екенін мәлімдеді.
Аудиенция соңында Португалия Президенті Қазақстан басшысына ізгі тілектерін жолдап, Лиссабонда жоғары деңгейдегі кездесуге дайын екенін растады.
Дереккөз: ҚР СІМ баспасөз қызметі
