Қазақстанның БҰҰ жанындағы Тұрақты өкілі Қайрат Омаров БҰҰ Бас Ассамблеясының жұмысын жандандыру жөніндегі арнайы жұмыс тобының тақырыптық пікірталастарында сөз сөйледі.
Өз сөзінде ол БҰҰ-ның негізгі өкілдік және саяси органы ретінде Бас Ассамблеяның рөлін және өкілеттіктерін нығайтудың маңыздылығын атап өтті. Бұл жаһандық тұрақсыздық жағдайында ерекше өзекті болып табылады. Ассамблеяның рөлін нығайту ҚР Президенті Қасым-Жомарт Тоқаевтың көзқарасына толықтай сай келеді. Президент БҰҰ-ны XXI ғасырдың жаңа сын-қатерлеріне бейімдеу, оның институттарын реформалау және олардың тиімділігін арттыру қажеттілігін бірнеше рет атап өтті. Мемлекет басшымыз Ұйымның болашағы халықаралық қауымдастықтың үміттеріне сай болу және климаттың өзгеруі, қақтығыстар, кедейшілік және әлеуметтік теңсіздік сияқты жаһандық сын-қатерлерге жедел жауап беру қабілетіне байланысты екенін айтты.
Қазақстан реформаның негізгі басымдықтарын айқындады. Олардың қатарында: Бас Ассамблеяның БҰҰ-ның басқа органдарымен және мамандандырылған агенттіктерімен өзара іс-қимылын күшейту, гендерлік теңдік пен ашықтықты ілгерілету, сондай-ақ жаңа төрағалар үшін ұсынымдарды мұрағаттау жүйесін құру арқылы институционалдық жадыны сақтау. Қазақстанның осы бастамалары, соның ішінде өтпелі бағдарламаларды әзірлеу, мұрағаттау және процестерді стандарттау Мемлекет басшымыздың БҰҰ жұмысының ашықтығы мен тиімділігін арттыруға үндеуінен туындайды.
Талқылау барысында делегациялар бірқатар маңызды мәселелерді қозғады. Олардың ішінде Бас Ассамблея төрағасының «адал делдал» ретіндегі рөлін күшейту. Қазақстан төрағаның тәуелсіздігін тұрақты қаржыландыру және кадрлық құрамды кеңейту арқылы қамтамасыз ету қажеттігін қолдады. Бұл шаралар БҰҰ-ға деген сенімді арттыруға және жаһандық ынтымақтастықты нығайтуға көмектеседі.
Гендерлік теңдікке қол жеткізу қажеттілігіне де ерекше назар аударылды. Бұл талқылаудың маңызды аспектіне айналып, Қазақстанды қоса алғанда бірқатар елдер тарапынан қолдау тапты.
Қазақстан өкілі еліміз тарапынан Бас Ассамблеяны жаһандық ынтымақтастықты нығайту жөніндегі күш-жігерінде қолдауға әзір екенін білдірді және Қазақстанның БҰҰ Жарғысының құндылықтарына бейілділігін растады. Қазақстан БҰҰ-ны барлық мүше мемлекеттердің мүддесі үшін реформалау жөніндегі бастамаларды белсенді түрде ілгерілетуін жалғастырады. Бұл күш-жігер Мемлекет басшымыз айқындаған стратегиялық көзқарас пен басшылық қағидаттарына негізделген.
Дереккөз: ҚР СІМ баспасөз қызметі
