Қазақстанның 100 үздігінің қатарында

Елбасы Нұрсұлтан Әбішұлы Назарбаевтың «Болашаққа бағдар: Рухани жаңғыру» атты бағдарламалық мақаласын жастар арасында кеңінен насихаттау мақсатында, Нұр-Сұлтан қаласында байқау өтті. «ҚР 100 үздік дарынды оқушысы» атты сайысқа Шеңгелді ауылында орналасқан №57 С.Мұқанов жалпы орта мектебінің 10-сынып оқушысы Оспан Бану қатысып, жеңіспен оралды. Елордаға барып, өз білімін көрсетіп, ауданымыздың атын шығарған дарынды қызды ұстаздар қауымы салтанатты түрде күтіп алды.

Нұр-Сұлтан қаласына барып, жеңіспен оралған оқушысын С.Мұқанов жалпы орта мектебінің ұстаздары қуана қарсы алды. Шәкірттеріне берген білімнің нәтижесін көру барлық ағарту саласы мамандарының басты мақсаты емес пе? Ұлы ақын Абай Құнанбайұлының 175 жылдық мерейтойына арнап ағылшынша эссе жазып, бас қалада бақ сынасып 1-дәрежелі диплом және «Қазақстан Республикасының дарынды оқушысы» атты төс белгімен марапатталған Бану Досжанқызын мектеп директоры Сәуле Ақылбекова құттықтады.

Сәуле Ақылбекова, №57 С. Мұқанов. Атындағы ж.о.м директоры

Оспан Банудың бұндай жетістікке жетуіне мұрындық болған, оның жетекшісі Балжан Қабылова да 1-дәрежелі диплом және «Үздік педагогтер» академиясының толық мүшесі болып қабылданып, оған арнайы белгіше мен куәлік табысталды.

Балжан Қабылова, №57 С.Мұқанов атындағы ж.о.м мұғалімі

Бану Оспан, №57 С.Мұқанов атындағы ж.о.м оқушысы

Иә, «ұстазы жақсының – ұстамы жақсы» деген емес пе? Әрбір баланың мектеп табалдырығын аттаған сәттен бастап білім кірпішінің дұрыс қалануында бастауыш мұғалімінің еңбегі орасан. Алғашқы іргетасы мықты қаланған шәкірттің білім шыңына жетуі ұстаздардың адал еңбегі. Өз еңбектерінің жемісін көрген Банудың мұғалімдері де оқушысына деген жылы лебіздерін жеткізді.

Гүлнара Салықбаева, №57 С.Мұқанов атындағы ж.о.м мұғалімі

Банумен бірге Нұр-Сұлтан қаласына әжесі барған. Немересіне қолдау білдірген ақ жаулықты әже барша ұстаздар қауымына алғысын жеткізді.

Құралай Қоңыратбаева, Банудың әжесі

Марапаттау рәсімінен соң мектеп кітапханасында Бануды сыныптастары күтіп алды. Жеңісімен құттықтап, Республикалық байқаудың өту барысы мен алған әсері жайында әңгімелер өрбітті.

Айта кетейік, 2014 жылы іргесі қаланған С.Мұқанов атындағы жалпы орта мектебіне ағымдағы оқу жылында жөндеу жұмыстары жүргізіліпті. Ғимараттың жылу құбырлары мен шатырын ретке келтірген мердігер компания – «Ынтымақ-Ырыс» ЖШС. 455 оқушы білім алатын оқу ордасы 3-тоқсанда офлайн түрде сабақ бастауды жоспарлап отыр.

Авторлар: Әлия Мұхаммедшәмиқызы, Тимур Райымқұлов