Калькутта қаласында 8-ші Бенгал жаһандық бизнес саммиті өтіп, оған 5000 делегат, оның ішінде саясаткерлер, корпорация басшылары, бизнес-делегациялар, кәсіпкерлер, бүкіл әлемнің ғылыми топтары мен сараптамалық орталықтарының өкілдері стратегиялық жобаларды құру мақсатында және іскерлік альянстарды, сондай-ақ өнеркәсіптік экожүйені және бизнеске қолайлы мемлекеттік бастамаларды қарастыру үшін қатысты.

Іс-шара бағдарламасына пленарлық отырыстар, параллельді конференциялар, мақсатты секторларға арналған салалық сессиялар, серіктес елдермен елдік сессиялар, B2B және B2G кездесулері кірді.

Қазақстандық делегацияны Үндістандағы ҚР Елшісі Нұрлан Жалғасбаев бастап, пленарлық отырыс барысында сөйлеген сөзінде Қазақстан мен Үндістан арасындағы қатынастардың дамуындағы оң үрдісті атап өтті. Ол экономикалық ынтымақтастықтың перспективаларына, атап айтқанда өнеркәсіп, туризм, ауыл шаруашылығы, IT және басқа да салаларға ерекше назар аударды. Оның айтуынша, Қазақстан мен Үндістанда жақын арада қарым-қатынас деңгейін арттыру үшін барлық алғышарттар бар, өйткені елдер экономикалық өсу деңгейін қолдауға бағытталған ортақ мүдделерді көздейді.

Сонымен қатар саммит қатысушыларына халықаралық аренада елдің имиджін ілгерілетуге бағытталған «Kazakhstan Born Bold» медиакампаниясы, сондай-ақ алдағы Астана халықаралық форумы туралы ақпарат ұсынылды, ол жаһандық диалог пен ынтымақтастық үшін маңызды платформа болатындығы айтылды.

«Батыс Бенгалия, әсіресе Калькутта қаласы – Үндістандағы IT индустриясының орталықтарының бірі. Осы кезеңде өзінің цифрлық технологияларын дамытатын Қазақстан бағдарламалық қамтамасыз етуді, жасанды интеллектті және басқа да жоғары технологиялық бағыттарды әзірлеу саласында үнді компаниялармен ынтымақтаса алады», – деп атап өтті өз сөзінде қазақстандық өкіл.

Панельдік сессияда баяндама жасай отырып, қазақстандық делегация басшысы қатысушыларды Қазақстанның инвестициялық ахуалымен таныстырды. Сонымен қатар ол еліміздің экономикалық мүмкіндіктерін көрнекі түрде көрсету мақсатында ірі бенгал бизнесінің өкілдері үшін сапар ұйымдастыруды ұсынды.

Іс-шара аясында бірқатар нәтижелі екіжақты кездесулер өтті, оның барысында шетелдік инвесторлар үшін мемлекеттік қолдау шаралары және Қазақстанда жүргізіліп жатқан саяси реформалар туралы айтылды. Екіжақты кездесулердің барлық қатысушыларына танысу үшін ақпараттық буклеттер мен тиісті инвестициялық тизерлер берілді.

Батыс Бенгалия тез экономикалық орталыққа айналуда. Стратегиялық географиялық артықшылықтардың, белсенді мемлекеттік саясаттың, білікті кадрлардың және динамикалық бизнес ортаның үйлесімі арқылы Батыс Бенгалия Үндістанның экономикалық өсу тарихындағы негізгі ойыншыға айналды. Штат халқы шамамен 92 миллион адамды құрайды.

Дереккөз: ҚР СІМ баспасөз қызметі