«Global New York Chamber of Commerce» (GNYCC) алаңында Қазақстан мен АҚШ бизнес және дипломатия өкілдерінің кездесуі өтті.

Талқылаулар іскерлік байланыстарды нығайтуға арналды және екі ел арасындағы сауда-экономикалық ынтымақтастықтың жаңа бағыттарын анықтауға негіз қалады. Оған қаржы, денсаулық сақтау, ауыл шаруашылығы, IT салалары, сондай-ақ қазақстандық агроөнеркәсіп өнімдерінің АҚШ нарығына экспортын ұлғайту мәселелері кірді.

Іс-шара аясында «GNYCC» палатасының президенті С.Өмірзақов, Нью-Йорк қаласындағы ҚР Бас консулы Р.Тлеулин, Қазақстанның іскер әйелдер ассоциациясының президенті Р.Сәрсембаева және Нью-Йорк қаласы мэриясының Сауда, инвестициялар және инновациялар жөніндегі комиссарының орынбасары Д.Чаухан сөз сөйледі.

«Global New York Chamber of Commerce» алаңы Нью-Йорктің қаржы нарығының өкілдері, инвесторлар мен іскер серіктестер үшін Қазақстан экономикасының даму динамикасымен, оның әлеуетімен және өзекті инвестициялық жобаларымен танысуға мүмкіндік берді.

Қатысушылар жүргізіліп жатқан экономикалық реформаларды жоғары бағалап, олардың ел мен жалпы өңірдің дамуына жаңа серпін беретінін және бұл Қазақстанның америкалық бизнес үшін инвестициялық тартымдылығын арттыратынын атап өтті.

Сонымен қатар күн тәртібінде әйелдер кәсіпкерлігін дамыту және өз ісін кеңейтуді көздейтін іскер әйелдерді қолдауға бағытталған Астана қаласындағы Әйелдер кәсіпкерлігі академиясының бағдарламалары арқылы бастапқы кәсіпкерлердің бәсекеге қабілеттілігін арттыру мәселелері талқыланды.

Дереккөз: ҚР СІМ баспасөз қызметі