Францияның Страсбург қаласында Еуропарламенттің кезекті көшпелі сессиясы өтті. Пікірталастың негізгі мәселелерінің бірі – Газа секторы мен Ливандағы жағдай. Бұл туралы satmedia.kz тілшісі Kazinform-ға сілтеме жасап хабарлайды.
Бірқатар еуродепутат Израильдің Ливандағы БҰҰ уақытша күштерінің нысандарына бірнеше рет шабуыл жасағаннан кейін елдегі БҰҰ миссиясын қорғауға шақырды.
Пікірталасқа Дағдарысты басқару жөніндегі Еурокомиссар Янез Ленарчич қатысып, Еуроодақ ХАМАС-ты қаржыландырып отыр деген кейбір айыптаулардың негізсіз екенін айтты.
«ЕО ХАМАС-ты қаржыландырмайды. Сонымен қатар, Еурокомиссия Израильге қару-жарақ жеткізумен айналыспайды. Бұл ЕО-ға мүше мемлекеттердің қатысуымен жасалған екіжақты келісімдермен реттеледі», – деді Янез Ленарчич.
Бұдан басқа, Еурокомиссар қақтығыс тараптарын азаматтық инфрақұрылымды қиратуды және БҰҰ-ның «UNIFIL» уақытша күштеріне шабуылдарды тоқтатуға шақырды.
Дереккөз: Kazinform
