Қазақстан мен Хорватия іскер топтарының байланыстарын дамыту және бұл үдеріске Хорватияның Экономикалық палатасының қатысуы Қазақстанның Хорватиядағы Елшісі Даулет Батрашевтың Хорватия Экономикалық палатасының вице-президенті Игор Показпен кездесуі мен Далмация өңірінің әкімшілік орталығы – Сплит қаласына жасаған жұмыс сапарының басты тақырыбы болды.
Екіжақты әріптестікті әртараптандыру және сауда айналымын ұлғайту мақсатында Д. Батрашев пен И. Показ осы жылдың сәуір айының соңында Астанада қазақ-хорват бизнес-форумын ұйымдастыру мәселелерін талқылады. Бұл форумға экономиканың әртүрлі секторларынан 28-ден астам хорват компаниясының қатысуы жоспарлануда.
Хорватияның Экономикалық палатасының жүйесі кәсіпкерлер пайдалана алатын кең мүмкіндіктерге ие және елдің барлық өңірлерінде ұсынылған. Осыған байланысты 2024 жылы құрылған «Қазақстан–Хорватия» Іскерлік кеңесі аясында сауда-экономикалық ынтымақтастықты жандандыру үшін кең мүмкіндіктер бар.
Сплит қаласының мэрі Ивица Пулякпен кездесу барысында экономикалық және мәдени-гуманитарлық байланыстарды жолға қою мәселелері бойынша пікір алмасу болды. Қала басшылығына Сплит қаласындағы Қазақстанның Құрметті консулдығына көрсеткен қолдауы үшін алғыс білдірілді. Сонымен қатар тараптар жыл сайын 5 миллионнан астам шетелдік турист келетін Сплиттің тарихи бөлігінде Қазақстанның инвестициялық және туристік әлеуетіне арналған көрме өткізу мүмкіндігін талқылады.
Сплит университетінің басшылығымен қазақстандық студенттердің Теңіз зерттеулері факультетінде білім алу мүмкіндігі қарастырылды.
Сапар аясында қазақстандық дипломат Далмация өңірінің бизнес және іскерлік топтарының өкілдерімен бірқатар кездесулер өткізді.
Дереккөз: ҚР СІМ баспасөз қызметі
