«Тәуелсіздік – бәрінен қымбат»

Биылғы жыл еліміз үшін маңызды мерейлі мереке. Яғни, қастерлі тәуелсіздігімізге – 30 жыл. Осыған орай, ел президенті Қасым-Жомарт Кемелұлы «Тәуелсіздік бәрінен қымбат» атты мақаласын жариялады. Қазақстанның өткені мен бүгіні толық сараланып, болашаққа бағдары айқындалған мақала жайын әріптесім айтып береді.

Иә, қас қағым сәтте өте шыққан 30 жылда қазақ елі етек жеңін жиып, бой түзеп, әлемнің дамыған елдерімен иық тіресетіндей кезеңге жетті. Өткен мен бүгінгіні саралаған ел президенті Қасым-Жомарт Кемелұлы халқына жариялаған мақаласында ел дамуын үш кезеңге бөлді. Әр он жылда атқарылған жұмыстар мен жеткен жетістіктерді тізбектей келе, «Бағдар мен белес», «Таным мен тағылым», «Қоғам мен құндылық», «Ұлағат пен ұстаным» атты төрт тармақта елдің даму белестерін жеткізе білді.

Айнаш Бұхарова, Келес аудандық орталық кітапханасының оқырмандарға қызмет көрсету бөлімінің меңгерушісі

Сондай-ақ, мемлекет басшысы «Тәуелсіз ел болу оны жариялаумен немесе мемлекеттің іргетасын қалаумен шектелмейді. Тәуелсіздік үшін нағыз күрес күнделікті еңбекпен, үздіксіз әрі дәйекті елдік саясатпен мәңгі жалғасады. Біз қуатты тәуелсіз мемлекетімізбен ғана ұлт ретінде жер бетінде сақталамыз. Осы айнымас ақиқатты берік ұстануымыз қажет. «Тәуелсіздік бәрінен қымбат!» деген бір ауыз сөз мәңгі ұранымыз болуы тиіс» деп, ұғынар ұлтқа ұран болар сөзді шегеледі.

Ержан Ашимов, Келес ауданы әкімдігінің баспасөз хатшысы

Ата-бабамыздың білектің күшімен, найзаның ұшымен бізге аманаттаған тәуелсіздігі ең қымбат қазына. Отыз жыл ішінде жеткен әрбір жетістік бабалар арманының орындалғаны. Тәуелсіздігіміздің нышаны болған мемлекеттік тіліміз, дініміз, рәміздеріміз, конституциямыз бен ұлттық теңгеміз – барлығы Қазақстан мемлекетінің айнасы екендігі айқын.

Авторлар: Әлия Мұхаммедшәмиқызы, Мейірхан Бақытжанұлы, Дінислам Тәліпбай