Иран астанасында Экономикалық ынтымақтастық ұйымының (ЭЫҰ) Өңірлік жоспарлау кеңесінің (ӨЖК) 35-ші отырысы өз жұмысын бастады. Отырысқа Әзербайжан, Иран, Қазақстан, Қырғызстан, Пәкістан, Тәжікстан, Түркия, Түрікменстан және Өзбекстан сынды ЭЫҰ-ға мүше мемлекеттердің жоғары деңгейдегі делегациялары қатысты. 24-27 ақпан аралығында өтетін төрт күндік отырыста ЭЫҰ жобалары мен бағдарламаларының жүзеге асырылу барысы қаралып, ұйымның алдағы жылға арналған жоспары талқыланады.
2025 жылы ЭЫҰ-ға төрағалық етуші ел ретінде Қазақстан жиынды салтанатты түрде ашты. Қазақстан Республикасының ЭЫҰ жанындағы Тұрақты өкілі, Қазақстанның Ирандағы Елшісі Онталап Оналбаев отырысты басқарды. Өзінің кіріспе сөзінде қазақ дипломаты Қазақстанның ЭЫҰ аясындағы өңірлік ынтымақтастықты нығайтуға бейілділігін растады және ұйымның экономикалық өсім, сауда және орнықты даму саласындағы маңызды рөлін атап өтті.
Қазақстанның ЭЫҰ төрағасы ретіндегі басымдықтары ретінде өңірлік сауда мен көліктік байланыстарды дамыту, энергетикалық серіктестікті кеңейту, азық-түлік қауіпсіздігін қамтамасыз ету және экономикалық бәсекеге қабілеттілікті арттыру үшін цифрлық трансформацияны ілгерілету мәселелері ерекше аталып өтті.
Отырыс барысында ЭЫҰ-ның әртүрлі бағыттары бойынша пікірталастар жалғасып, болашақ ынтымақтастық пен жобаларды жүзеге асыру мәселелері қарастырылады. ӨЖК-нің 35-ші отырысы қорытындысы бойынша негізгі ұсынымдар, Іс-шаралар күнтізбесі, Жұмыс бағдарламасы және 2025 жылға арналған Жұмыс жоспары қабылданады деп жоспарлануда, бұл құжаттар ұйымның алдағы жылғы қызметіне бағыт береді.
Дереккөз: ҚР СІМ баспасөз қызметі
