ҚР Премьер-Министрінің орынбасары Тамара Дүйсенова «Ауыл аманаты» жобасының Ақмола облысында іске асырылу барысын тексеріп, бірқатар әлеуметтік нысанды аралады, – деп хабарлайды satmedia.kz тілшісі primeminister.kz сайтына сілтеме жасап.

«Ауыл аманаты» жобасына қатысушылардың бірі, Атбасар ауданының тұрғыны Виталий Дубинин 3,5 млн теңгеге көлік жөндеу стансасын ашты. Ал, Аида Мейрамова наубайхана жұмысын ұйымдастырып, 8,6 млн теңгеге жеңілдігі бар несие алған. Қазіргі таңда наубайхана 16 адамды жұмыспен қамтып отыр.
Тамара Дүйсеноваға «Ауыл аманаты» жобасына қатысушылар шығарған өнімдердің өңірлік көрмесі ұсынылды.

Вице-премьер өңір басшысы Марат Ахметжановпен бірлесіп облыстың аудандары мен ауылдық округтері әкімдерінің қатысуымен бағдарламаны іске асыру жөнінде кеңес өткізді. Онда басқа да салаларда жүзеге асқан үздік жобалар қаралды. Денсаулық сақтау саласын дамытудың өзекті мәселелері өңірдегі медициналық мекемелердің бас дәрігерлерінің қатысуымен өткен кеңесте қаралды.

Сонымен қатар, спортты дамыту мәселелері бойынша кеңес өткізіліп, спорттық ұйымдар мен мектеп басшылары қатысты.