Қазақстанның Таиландтағы Елшілігі «Kazakh Community» ассоциациясының қолдауымен Наурыз мейрамын атап өтті. Іс-шараға Таиландта тұратын және жұмыс істейтін қазақстандықтар, сондай-ақ тай қонақтары қатысты.

Қазақстанның Таиландтағы Елшісі Арман Исетов барлық қатысушыларды осы маңызды мерекемен құттықтап, Наурыз мейрамы адамдар арасындағы үйлесімділік пен бірлікті білдіретінін атап өтті. Ол Қазақстан Президенті Қасым-Жомарт Тоқаев пен ҚР Үкіметі талантты жастарға ерекше көңіл бөлетінін, өмір сүру сапасын жақсартуға жаңа мүмкіндіктер жасап, кез келген сынақтарға жауап беретін мықты ұлт қалыптастыратынын атап өтті . Бұл шаралардың барлығы болашақ ұрпақ үшін табысты, әділ және өркендеген Қазақстанды құруға бағытталған.

Іс-шара барысында Елшілік дәстүрлі қазақ киіз үйін орнатып, ұлттық киімдер ұсынды . Қонақтарға қазақтың халық аспабы – домбыраның сазын тыңдауға мүмкіндік берілді. Кештің кульминациясы ретінде «Катюша» ансамблінің жарқын қойылымы болды, оның қатысушылары – тай қыздары танымал қазақ билерін орындап, көрермендерді ұлттық мәдениет атмосферасына бөледі.

Сонымен қатар мереке қатысушылары мен балалар қазақтың ұлттық ойындарында – тоғыз құмалақ және асық ату сайыстарына қатысып, көңілді әрі қызықты атмосфераға еніп кетті.

Кеш соңында қонақтар қазақтың дәстүрлі тағамдарынан дәм татып, Қазақстан мәдениетіне тағы бір рет тәнті болды. Ең белсенді қатысушылар мен ұйымдастырушыларға алғыс хаттар табысталды.

Дереккөз: ҚР СІМ баспасөз қызметі