Корея Республикасының астанасында «Корея мен Қазақстан арасындағы маңызды минералдар жөніндегі инвестициялық диалог» атты семинар өтті. Іс-шара Кореяның геологиялық зерттеулер және минералдық ресурстар институтының (KIGAM) қолдауымен ұйымдастырылды. Оған «Hyundai Development Company», «POSCO International», «LX International» сияқты жетекші корейлік компаниялармен қатар, Сеул ұлттық университеті және Пусан ұлттық университеті секілді беделді оқу орындарының өкілдері қатысты.

Қазақстанның Оңтүстік Кореядағы Елшісі Нұрғали Арыстанов өз сөзінде маңызды материалдар саласындағы екіжақты ынтымақтастықты кеңейтудің маңыздылығын атап өтті. Ол Қазақстанның Корея Республикасымен литийді барлау, өндіру және өңдеу саласында тығыз ынтымақтастық орнатуға дайын екенін айтты. Литий – жоғары технологиялық индустриялар мен тұрақты экономикалық даму үшін аса қажетті және стратегиялық маңызды ресурстардың бірі.

«KIGAM» президенті Ли Пён Гу корей компанияларын Қазақстанға инвестиция салуды күшейтуге шақырып, елдің маңызды минералдар саласындағы зор әлеуетін атап өтті.

Кореядағы «Kazakh Invest» ҰК» АҚ өкілі Дәулет Сақтағанов шетелдік инвесторларға Қазақстан ұсынатын негізгі инвестициялық мүмкіндіктер мен жеңілдіктер туралы ақпарат берді.

Іс-шара барысында сондай-ақ Шығыс Қазақстан облысындағы «Бакенное» литий кен орнына жүргізілген зерттеу нәтижелері ұсынылды. Бұл қатысушылардың үлкен қызығушылығын тудырып, маңызды минералдарды өндіру және өңдеу саласына инвестиция тартуда маңызды қадам болды.

Семинар қорытындысы бойынша корей компаниялары Қазақстанмен маңызды материалдар саласындағы ынтымақтастықты тереңдетуге мүдделі екенін білдірді. Тараптар екі елдің қажеттіліктеріне сай табиғи ресурстарды тиімді пайдалану мен дамытуға бағытталған бірлескен жобаларды іске асыру мүмкіндіктерін талқылады.

Дереккөз: ҚР СІМ баспасөз қызметі