Астаналық мәдени мұра орталығы «Ханшайым Любица сарайында» «Ұлы Даланың мәдени мұрасы» атты этнографиялық көрмесінің салтанатты ашылуы өтті.
Көрме қатысушыларына Алматы қаласының мұражайлар бірлестігінің қорынан 220-дан астам экспонат ұсынылды. Экспозицияның негізін қазақ халқының тұрмысы мен дәстүрлері, қолданбалы өнері туралы баяндайтын этнографиялық артефактілер құрайды, сондай-ақ, қазақ халық музыкалық аспаптары, Алматы қаласының тарихы мен қазіргі өмірін бейнелейтін фотосуреттер ұсынылған.
Қазақстанның Сербиядағы Елшісі Мәди Атамқұлов өз сөзінде бұл көрменің мақсаты Қазақстан мен Сербия арасындағы мәдени байланыстарды нығайту, сонымен бірге, Ұлы дала халқының тарихы мен мәдениетін, көшпелі өркениет мәдениеті мен дәстүрлерін, тұрмысын, қазақ көшпенділерінің философиясы мен дүниетанымын таныстыру болып табылатынын атап өтті.
Қазақстандық дипломат мұндай көрме Балқан түбегінде алғаш рет ұйымдастырылғанын және жыл сайын екі ел арасындағы мәдени байланыстар нығайып келе жатқанын айтты.
Көрменің ашылуына Сербия Президенті Александр Вучичтің жұбайы Тамара Вучич ханым, Сербия Президентінің мәдени мәселелер жөніндегі кеңесшісі Деян Савич мырза, Сербияның саяси тұлғалары, дипломатиялық корпус, академиялық және ғылыми топтардың өкілдері, қоғамдық ұйымдардың басшылары, мәдениет қайраткерлері және БАҚ қатысты.
Көрме соңында қазақстандық талантты домбырашы – Еркін Құдайбергеннің орындаушылық шеберлігі серб жұртшылығын қуантты.
Алматы қ. мұражайлар бірлестігі қорының коллекциялары бұдан алдын Сеул (Оңтүстік Корея), Ыстамбұл (Түркия), Неаполь (Италия), Вена (Аустрия), Прага (Чехия) және Карцаг (Мажарстан) көрме залдарында қойылды.
Дереккөз: ҚР СІМ баспасөз қызметі
