Еуроодақ Ресейге қарсы он үшінші жеке және экономикалық санкциялар пакетін қабылдады, – дейді ЕО кеңесі. Бұл туралы satmedia.kz тілшісі Tengrinews.kz-ке сілтеме жасап хабарайды.

Кеңес Ресейдің Украинаға қарсы соғыста әскери-өндірістік кешенін тікелей қолдайтын 27 жаңа ұйымды қосты. Бұл ұйымдардың кейбірі үшінші елдерде орналасқаны, олардың тізіміне Қазақстан да кіретіні атап өтілді. Басқа елдерге Үндістан, Шри-Ланка, Қытай, Сербия, Таиланд және Түркия кіреді.

Баспасөз хабарламасындағы мәлімет бойынша, осы елдердің компаниялары сауда шектеулерін айналып өтуге тартылған, ал басқалары Ресейдің әскери-өнеркәсіптік кешені үшін электрон компоненттерді әзірлеуге, өндіруге және жеткізуге қатысатын ресейлік ұйымдар.

«Оларға қосарлы мақсаттағы тауарлар мен технологияларға, сондай-ақ Ресейдің қорғаныс және қауіпсіздік секторын технологиялық тұрғыдан нығайтуға ықпал ететін тауарлар мен технологияларға экспорттық шектеулер күшейтіледі», – делінген хабарламада.

Жалпы алғанда, Украинаның аумақтық тұтастығына, егемендігі мен тәуелсіздігіне нұқсан келтіретін немесе қауіп төндіретін әрекеттерге қарсы ЕО шектеу шаралары қазіргі уақытта 2 мыңнан аса жеке және заңды тұлғаларға қатысты.

Дереккөз: Tengrinews.kz