Қазақстанның Франциядағы Елшісі Гүлсара Арыстанқұлованың, Францияның Сыртқы сауда жөніндегі кеңесшілері кеңесінің президенті Софи Сидостың, қазақ-француз Іскерлік кеңесінің тең төрағасы Ги Сидостың, Франция кәсіпкерлерінің ең ірі қауымдастығы «MEDEF» өкілдерінің және Қазақстанның «Атамекен» ұлттық кәсіпкерлер палатасының өкілі Ғалымжан Дұғаловтың қатысуымен дөңгелек үстел өтті.
Іс-шара барысында қазақ дипломаты 2024 жылғы 4-5 қарашада ҚР Президенті Қасым-Жомарт Тоқаевтың Парижге жасаған алғашқы мемлекеттік сапарының қорытындылары бойынша қол жеткізілген келісімдерді еске салып, екі елдің өзара тиімді ынтымақтастығы үшін ашылған жаңа мүмкіндіктерге тоқталды. Сонымен қатар ол шетелдік инвесторларға арналған мемлекеттік қолдау шараларын жетілдіру туралы ақпарат ұсынды және 2025 жылы Қазақстанда өтетін негізгі іс-шаралар, соның ішінде «Астана» халықаралық форумы туралы мәлімет берді.
Өз кезегінде Овернь-Рона-Альпы өңіріндегі Қазақстанның Құрметті консулы қызметін де атқарып келе жатқан С.Сидос Францияның сыртқы сауда кеңесшілерінің, соның ішінде Қазақстандағы қызметі туралы айтып, қазақстандық бизнес өкілдерімен ынтымақтастықты белсенді түрде дамытуға дайын екенін жеткізді.
Сонымен қатар іс-шара қатысушылары энергетика, сирек кездесетін материалдар, тұрғын үй-коммуналдық шаруашылығы, агроөнеркәсіптік кешен және логистика салалардағы екіжақты жобаларды іске асыру перспективаларын талқылады. Осыған байланысты француз делегацияларының Астанаға және қазақстандық мемлекеттік органдар мен компаниялардың Парижге салалық сапарларын ұйымдастыруға жәрдемдесу туралы уағдаластыққа қол жеткізілді.
Дөңгелек үстелдің соңында тараптар алдағы кезеңге арналған бірлескен жұмыс жоспарын, соның ішінде Астанада қазақ-француз бизнес-форумын ұйымдастыру мәселесін пысықтауды белгіледі.
Францияның Сыртқы сауда жөніндегі кеңесшілері кеңесі (Conseillers du Commerce Extérieur de la France, CCE) – француз экономикасын дамытуға 120 жылдан астам уақыт бойы ерікті түрде белсенді қатысып келе жатқан кәсіпорын басшылары мен халықаралық сарапшылар қауымдастығы. Бүгінгі таңда оның құрамында Францияда және әлемнің 150-ден астам елінде шамамен 4600 мүше бар. «Vicat» холдингінің вице-президенті Софи Сидос – CCE президенті қызметіне сайланған алғашқы әйел. «Vicat» компаниясы Қазақстанда 2007 жылдан бері Жамбыл облысында салған зауытта цемент өндіріп келеді.
Дереккөз: ҚР СІМ баспасөз қызметі
