Бельгияда аккредиттелген Орталық Азия елдері мен Моңғолия елшілерінің бастамасымен Еуропалық парламенттің Сыртқы істер комитетінің төрағасы Дэвид Маккалистермен кездесу өтті.
Кездесу барысында екіжақты және өңірлік ынтымақтастық мәселелері талқыланды. Қазақстанның Бельгиядағы Елшісі Марғұлан Баймұхан Орталық Азия өңірінің Еуропалық одақ үшін көлік, логистика, стратегиялық маңызды шикізат пен энергия жеткізу салаларындағы маңыздылығын атап өтті.
Кездесуге қатысушылар алдағы іс-шараларды, оның ішінде ЕО мен Орталық Азияның Ауғанстан бойынша арнайы өкілдерінің алтыншы кездесуін, ЕО-ОА 20-шы министрлер конференциясын және 2025 жылдың көктемінде Өзбекстанда өтетін ЕО-Орталық Азия cаммитін талқылады. Сондай-ақ Еуропалық одақтың халықаралық ынтымақтастық жөніндегі комиссары Йозеф Сикеланың алдағы сапары аталып өтті.
Д.Маккалистер ұзақ уақыт бойы жоспарланған ЕО-ОА Саммитінің маңыздылығына тоқталып, Еуропалық парламенттің Орталық Азия елдерінің парламенттерімен жан-жақты ынтымақтастыққа дайын екенін растады.
Еуропалық парламенттің Орталық Азия және Моңғолия елдерімен байланыс жөніндегі делегациясының парламентаралық ынтымақтастықты нығайтудағы рөліне ерекше назар аударылды.
Д.Маккалистер Орталық Азияның халықаралық күн тәртібі, экономика және қауіпсіздік контекстіндегі маңыздылығын атап өтіп, өңір елдерінің парламенттерімен комитеттер арқылы ынтымақтасуға дайын екенін білдірді. Сондай-ақ Еуропалық парламенттегі Орталық Азия және Моңғолия елдері бойынша ұлттық баяндамашылармен өзара іс-қимылдың қажеттілігі айтылды.
Өз кезегінде қазақ дипломаты өңірде 2024 жылғы тамыз айында Астанада өткен Орталық Азия саммитінде бекітілген «Орталық Азия – 2040» өңірлік ынтымақтастықты дамыту тұжырымдамасы мен 2025-2027 жылдарға арналған жол картасының басымдықтарын іске асыруға ерекше назар аударылатынын атап өтті.
Қазақстан Елшісі сондай-ақ өңірдегі экономикалық өсу динамикасына назар аударды: Орталық Азия елдерінің жалпы ішкі өнімі шамамен 450 миллиард АҚШ долларын құрайды, ал өңіраралық сауда соңғы бес жылда 80%-ға артып, 11 миллиард АҚШ долларына жетті.
Сонымен қатар М.Баймұхан Орталық Азияның бірыңғай өңір ретінде дамуының жаңа кезеңіне назар аударды, оны Қазақстан Президенті Қасым-Жомарт Тоқаев «Орталық Азияның Ренессансы» деп атаған. Сондай-ақ Қазақстанның «Сәтті Орталық Азия – сәтті Қазақстан» қағидатын ұстанатынын және интеграциялық үдерістерді дамытуға ықпал етуге дайын екенін атап өтті.
Кездесу барысында қатысушылар өңір елдері мен Еуропалық одақ арасындағы байланыстарды нығайтуға ықпал ететін «ОА+» форматтарының тиімділігін атап өтті.
Дереккөз: ҚР СІМ баспасөз қызметі
