Мәжіліс депутаттары елімізге көміртекті егіншілікті енгізу және дамыту мәселелерін талқылады.
Мәжілістің Аграрлық мәселелер комитетінде дөңгелек үстел өтті.Онда депутаттар жауапты мемлекеттік органдардың өкілдерімен көміртекті егіншілікті енгізу және дамыту мәселелерін талқылады.
Отырысты ашқан депутат Нұржан Әшімбетов былтыр қараша айында БҰҰ-ның климаттың өзгеруі жөніндегі 29-конференциясында Президент Қасым-Жомарт Тоқаев ауыл шаруашылығының тұрақты тәжірибесіне көшу қажеттігіне тоқталғанын еске салды.
Ауыл шаруашылығы министрлігі Жер ресурстарын басқару комитетінің төрағасы Мұрат Теміржановтың айтуынша, елімізде 29,9 миллион гектар (11%) жер эрозияға ұшырап, құнарлылығы төмендеп, ауыл шаруашылығы әлеуетінің нашарлауына әкеліп соғуда. Бұл ретте 27,1 млн га (15%) жайылымдық жерге шамадан тыс мал жайылған. Көміртекті егіншілік арқылы жерді қалпына келтіру және оның құнарлы күйін сақтау мәселесін шешуге болады.
Экология және табиғи ресурстар министрлігінің климаттық саясат департаменті директорының міндетін атқарушы Нұрман Таңатов қазір Ауыл шаруашылығы министрлігімен бірлесіп 2025-2030 жылдарға арналған құжат әзірленіп жатқанын айтты.
Біріккен Ұлттар Ұйымы Азық-түлік және ауыл шаруашылығы ұйымының Жаһандық экологиялық қор жобаларының ұлттық үйлестірушісі Айжан Қарабаева климаттың өзгеруімен күресу, топырақ құнарлылығын арттыру және аграрлық секторда жаңа экономикалық мүмкіндіктер құру құралы ретінде көміртегі егіншілігін дамыту тәсілдерін ортаға салды. Өз кезегінде «Атамекен» Ұлттық кәсіпкерлер палатасы президиум төрағасының кеңесшісі Досым Қыдырбаев өз ұсыныстарын айтты.
Талқылау барысында депутаттар саланы дамытуға қатысты өз ұсыныстарын айтып, сұрақтарын қойды. Мысалы, көміртекті егіншілікті енгізу мен дамыту, ауылдардағы жайылымды жерлерді қалпына келтіру, топырақтың құнарлылығын арттыру, жасыл технологияларды енгізу, парниктік газдардың шығарылуы мен сіңірілуін реттеу және басқа да мәселелер көтерілді.
Дереккөз: parlam.kz
