Бүгін Мәжілісте инновациялық қызмет саласын мемлекеттік қолдау жүйесін жетілдіруге бағытталған заң жобасының таныстырылымы Мәжілістің Экономикалық реформа және өңірлік даму комитетінде, Нұртай Сабильяновтың төрағалығымен өтті.
Отырыста баяндама жасаған Цифрлық даму, инновациялар және аэроғарыш өнеркәсібі бірінші вице-министрі Қаныш Төлеушин «Astana Hub» IT-стартаптар халықаралық технопаркі мен «Инновациялық технологиялар паркі» автономды кластерлік қорын біріктіруді заңнамалық тұрғыдан реттеу ұсынылып отырғанын атап өтті.
Вице-министрдің айтуынша, мемлекеттік тапсырманы орындау үшін республикалық бюджеттен бөлінген қаражат пен Технопарк қатысушыларынан түскен алымдар «Astana Hub»-ты қаржыландырудың негізгі көздері болып саналады. Қор коммерциялық емес ұйым болғандықтан, заң жобасы «алымдар мен төлемдер» терминін олардың нақты мақсатын көрсететін «мүшелік жарналарға» ауыстыруды ұсынады. Бұл өзгерістер елдің мемлекеттік тапсырмаға арналған шығыстарын қысқартуға және «Astana Hub»-тың өзін-өзі ақтауын қамтамасыз етуге мүмкіндік береді. Бұл қатысушыларға тұрақты қолдау көрсетуге және елдің экожүйесін дамытуға жол ашады.
Талқылау барысында депутаттар отандық және халықаралық IT-компаниялар үшін «Astana Hub» резиденттеріне арналған салық жеңілдіктері, венчурлық қорларды дамыту, технопарктің тиімділігі және басқа да мәселелерге назар аударды.
Жиын барысында айтылған ұсыныстар депутат Айтуар Қошмамбетов жетекшілік ететін жұмыс тобында қаралатын болады.
Дереккөз: ҚР Парламенті мәжілісінің баспасөз қызметі
