Қазақстанның Беларусьтегі Елшілігі Беларусь Республикасының Ақпарат министрлігімен бірлесіп, 2025 жылғы 12-16 наурызда Беларусь астанасында өтіп жатқан XXXII Минск Халықаралық кітап көрмесі аясында ЕАЭО қатысушы мемлекеттердің «Қазақстан-Беларусь: Достық меридиандары» тақырыбындағы қазақстандық стендінің тұсаукесерін өткізді. Кітап көрмелерінің, пікірталас және презентация алаңдарының басты тақырыбы Ұлы Жеңістің 80 жылдығы болды.
Көрме қатысушылары мен келушілерді қарсы ала отырып, Қазақстанның Беларусьтегі Елшісі Тимур Жақсылықов Астана мен Минскінің мәдени-гуманитарлық саладағы тығыз ынтымақтастығын, екі ел өкілдерінің Қазақстан мен Беларусь аумағындағы түрлі мәдени іс-шараларға белсенді қатысуын баяндады.
Т. Жақсылықов биылғы жылы Ұлы Жеңістің 80 жылдығын атап өту жоспарлары туралы айтып, қазақстандықтар соғыстың алғашқы күндерінен бастап майданда жаумен соғысып, тылда аянбай еңбек еткенін атап өтті. Қазақстаннан 500-ге жуық жауынгер Кеңес Одағының Батыры атанды. Олардың 84-і Беларусь үшін шайқаста жасаған ерліктері үшін осы жоғары атаққа ие болды. Осыған байланысты 2024 жылғы 10 желтоқсанда Елшілік ұсынған «Қазақстандықтар Беларусь үшін шайқаста» атты интернет-жобасы жаңа ақпаратпен – мақалалармен, естеліктермен, тарихи құжаттармен толықтырылатын болады.
Қазақ дипломаты Елшіліктің Беларусьте соғысқан қазақстандық жауынгерлер туралы ақпарат жинау және есте сақтау жөніндегі тұрақты жұмысы туралы хабардар етті. 1990-шы жылдардан бастап Елшіліктің бастамасымен қазақстандықтардың ерлігіне арналған ондаған кітаптар жарық көріп, олардың көбі көрменің қазақстандық экспозициясында ұсынылғанын айтты.
Сонымен қатар Т. Жақсылықов қазақ-белорус әдеби байланыстарының бай дәстүрлері туралы айтып берді.
Қазақстандық тұсаукесердің басты оқиғаларының бірі әл-Фараби атындағы Қазақ ұлттық университетінің профессоры, тарих ғылымдарының докторы, Ұлы Отан соғысы жылдарында хабарсыз кеткен қазақстандық жауынгерлердің есімдерін іздеуге және қалпына келтіруге бүкіл өмірін арнаған Лайла Ахметованың сөз сөйлеуі болды. Ол Брест қамалының архивтерімен көп жылдық жұмысын баяндап, өзінің «Брест қамалы. 1941. Қазақстан» кітабын ұсынды. Бұл еңбек бекіністі қорғаушы 556 қазақстандық және осы бағытта соғысқан Қазақ КСР-ден 200-ден астам адам табылғанын баяндайды. ҚазҰУ профессоры бұл кітаптың II томы 2026 жылдың 22 маусымына дейін, Ұлы Отан соғысының қайғылы басталу күніне орайластырылып жарық көретіні туралы жоспарымен бөлісті.
Тұсаукесерде Беларусь жазушылар одағы төрағасының орынбасары Алексей Черота және «Беларусь жазушылар одағы» ҚБ-ның Минск қалалық бөлімшесінің төрағасы Михаил Поздняков (Мұхтар Әуезов шығармаларының аудармалары туралы) сөз сөйледі. Беларусь жазушысы және аудармашысы Виктор Шнип Абай өлеңдерінің белорус тіліне аудармасын оқыды.
Дереккөз: ҚР СІМ баспасөз қызметі
