Menu
«Nur Otan» партиясы атынан Келес аудандық мәслихатының депутаты болып Амангелді Жүзенов сайланды. Амангелді Асқарұлы туралы айтсақ, осыған дейін де әрдайым жалпақ жұртпен тығыз байланыста болып келе жатыр. Халықтың мұң-мұқтажына жіті құлақ асып, күрделі мәселелердің оңды шешілуіне ықпал етіп, аудан тұрғындарына қажетті жұмыстардың дер кезінде орындалуына қолдау көрсетіп келе жатқан азамат. Елдің игілігі жолында көптеген тірліктердің атқарылуына бастамашы болып жүрген жан. Аталған азаматпен тілшіміз сұхбаттасып қайтқан болатын.
Атпал азамат Амангелді Жүзенов туралы аз ғана ақпар айта өтсек, 1962 жылы 18 наурызда қазіргі Келес ауданына қарасты Ошақты ауылында өмірге келген. Алматы медициналық мемлекеттік институтын фармацевт мамандығы бойынша үздік бітіріп, еңбек жолында, сол жылдардағы Келес аудандық дәріханасы меңгерушісінің бірінші орынбасары, дәріхана меңгерушісі қызметтерін абыроймен атқарған. Амангелді Асқарұлы 2001 жылы медицина мен кәсіпкерлік саланы ұштастырып, «Асыл фарм компания» жауапкершілігі шектеулі серіктестігін ашып, міне, содан бері халықты сапалы, керекті дәрі-дәрмекпен қамтуда келелі еңбек етіп келеді. Азаматтың осыған дейін атқарған жұмыстарына тоқтала өтсек, 2017 жылы Сарыағаш аудандық мәслихатының 6-шақырылымдағы депутаты болып сайланған. Халық пен билік арасында алтын көпірге айналып, аудан тұрғындарының мұң-мұқтажы, күрделі проблемаларының оңды шешілуіне ықпал етіп келе жатқан ерен еңбек иесі. Жалпақ жұрттың қайғысы мен қуанышын бірге бөлісіп жүрген, қарапайым жандардың жай-күйінен хабардар халық қалаулысы.
Амангелді Жүзенов, Келес аудандық мәслихатының депутаты
Осы тұрғыда Амангелді Жүзеновтың қайырымды жан екендігін де айрықша айта кеткен жөн. Тұрмыс жағдайы төмен, асыраушысынан айырылған, мүмкіндігі шектеулі азаматтарға үнемі көмек көрсетуді әдетке айналдырған. Көптеген ізгілігі мол іс-шаралардың ұйымдастырушысы. Ал, енді қуанышты жаңалыққа ойыссақ, Амангелді Жүзенов, «Nur Otan» партиясы атынан Келес аудандық мәслихатының депутаты болып сайланды. «Депутат болу – бұл үлкен жауапкершілік. Маған үлкен сенім жүктеліп отыр. Сондықтан да мен алдағы уақытта «Nur Otan» партиясының бағдарламаларын басымдыққа ала отырып, бар күш-жігеріммен аянбастан халқыма қызмет етемін. Мақсатым халқымның алғысын, рақметін алу»,-дейді Амангелді Асқарұлы.
Амангелді Жүзенов, Келес аудандық мәслихатының депутаты
Сонымен қоса, депутат Амангелді Асқарұлы «алдағы кезеңде медицина саласын одан әрі дамытуға баса көңіл бөлемін. Халықтың медициналық көмекке қолжетімділігін арттырып, қарапайым жандарды бағасы тұрақты дәрі-дәрмекпен қамту бойынша тиісті жұмыстарды атқарамын. Өйткені мен үшін адам денсаулығы басты орында»,-дейді. Жалғай түссек, Амангелді Асқарұлы Қазақстан Республикасының тұңғыш президенті, Елбасы Нұрсұлтан Әбішұлы Назарбаевтың Қазақстан Республикасы тәуелсіздігіне 25 жыл мерекелік медалімен марапатталған. Сонымен қоса, Асфендияров атындағы Қазақ ұлттық медициналық университеттің фармацевт мамандығына адал қызметі үшін мерекелік медалі, Қазақстан Республикасы Денсаулық сақтау министрлігінің денсаулық сақтау ісіне қосқан үлесі үшін берілген бірнеше төсбелгісіне ие болған. Ерен еңбегі үшін облыстық, аудандық деңгейдегі көптеген алғыс хаттармен марапатталған Амангелді Жүзеновке 2019 жылы Келес ауданының құрметті азаматы атағы берілген. Осылайша, Амангелді Асқарұлы үлкен-кішіге сыйлы, көпшілікке қадірлі, жақсылығы мол азамат ретінде белгілі. Мәлімет ретінде келтіре кетсек, Амангелді Жүзенов отбасылы. Өмірлік жолдасы Күлаш Мамырайқызымен бірге 3 ұл мен қыздарын тәрбиелеп өсіріп, олардан 10-ға жақын немере сүйіп отырған бақытты ата.
Авторлар: Қуаныш Құлмырзаев, Рахманбек Құралов
Материалдарды толық және ішінара көшіріп алуға тыйым салынған. Сайт материалдарын пайдаланған жағдайда, ресурсқа сілтеме беріңіз.
