«la Sala de concieros Igasio Cevantes» театрында Қазақстан Республикасының Кубадағы Елшілігінің ұйымдастыруымен жергілікті халық пен болу еліндегі шетелдік дипломатиялық өкілдіктерге қазақ және халықаралық классикалық музыкасына арналған концерт өткізілді. Осылайша, алыстағы Куба аралында екіжақты қатынастар тарихында қазақтың ұлттық музыкасы алғашқы рет орындалды.
Көрермендердің алдында сахнаға АҚШ-тан Қазақстанның Куба еліндегі Елшісі Андриан Елемесовтің арнайы шақырумен Гаванаға келген әлемде белгілі қазақстандық скрипкашы Евгений Дио және әріптесі америкалық скрипкашы Вероника Мерседес Пазиминьо Джуркиевич өз өнерлерін көрсетті.
Музыканттар қазақ ұлттық музыкасы мен күйлерінен Қуат Шілдебаевтың «Қаракемерін», Ыбырайдың Е. Брусиловскийдің аранжировкасындағы «Гәкку», Латиф Хамидидің «Елігай», Жаяу Мұсаның «Ақ сиса», Ахмет Жұбановтың «Жезкиік», Абайдың «Айттым сәлем қаламқас», Е.Брусиловскийдің «Боз айғыр», Ахмет Жұбановтың «Ариясын» және «Қозы Көрпеш Баян сұлу» операсындағы солосын, ал халықаралық классикалық музыкадан Генрик Венявскидің «Этюды-Каприса», Шарль Огюст де Берионың «Аллегретто», Реинхолд Глиэрдің «Екі скрипкашыға арналған дуэтін», классикалық және басқа шетелдік композиторлар Карлос Гардельдің «Por Una Cabeza», Якоб Гаденің «Tango «Jealousy», Астор Пиазолланың «Libertango» туындыларын орындады. Көрермендерге қазақ ұлттық музыкасы мен күйлерінің әрбіріне қысқаша түсініктеме берілді.
Орындалған музыкалық туындылар, оның ішінде қазақ ұлттық музыкасы мен күйлері көрермендерге өте жағымды әсер етіп, олардың тарапынан шынайы ризашылық пен Қазақстанға деген қызығушылық тудырды.
Өткізілген мәдени іс-шара Қазақстаннан едәуір географиялық қашықтықта орналасқан кубалық көрермендерге және Куба Республикасында аккредиттелген шетелдік дипломатиялық мекемелердің өкілдеріне еліміздің ұлттық музыкасымен және музыкалық дәстүрлерімен жақынырақ танысуға мүмкіндік берді.
Доктор Евгений Дио қазіргі таңда Филадельфиядағы корей музыканттары қауымдастығының вице-президенті және төрағасының қызметін атқарады. Тоғыз жасында Қазақ мемлекеттік оркестрінде дебют жасаған сәттен бастап ол ТМД, Еуропа, Азия елдері, Канада және АҚШ-та, соның ішінде Карнеги Холл, Элис Тулли холл, Киммел концерт орталығы, Чайковский залы, Вена Моцартеумы, Меерсон холл, Астана филармониясының Президенттік залында, Ватиканда және Оңтүстік Кореяда, сондай-ақ БҰҰ-да өнер көрсетті. Ұлттық және халықаралық байқауларда көптеген марапаттарға, соның ішінде бас жүлдеге ие болған.
Вероника Мерседес Пазиминьо Джуркевич – Филадельфияда скрипкашы және альт аспабының орындаушысы ретінде әмбебап музыкант. Филадельфияда «Bismuth String Quartet», «Arcana New Music Ensemble» ансамбльдерінде және «Choral Arts Philadelphia» хорында әртүрлі жанрдағы халық және дәстүрлі музыкаларды ойнайды. «Friends Select School and Movemakers Philly» мектебінде скрипка мен альт аспабы бойынша сабақ береді.
Дереккөз: ҚР СІМ баспасөз қызметі
